У Гомелі «знік» першы намеснік старшыні аблвыканкама

Імя чыноўніка прыбралі з сайта.

Звольнены першы намеснік старшыні Гомельскага аблвыканкама Аляксандр Мікалуцкі. Як паведаміла Progomel.by памочніца першага намесніка старшыні Юлія Дзяркач, Аляксандр Віктаравіч адпрацаваў апошні дзень 3 верасня. Далей працоўныя стасункі з ім былі скасаваныя на пагадненне бакоў. Прычына не называецца.

Цяпер на сайце аблвыканкама насупраць пасады топ-чыноўніка Гомельскага рэгіёну, які курыруе аграпрамысловы комплекс, прозвішча не ўказанае. Часова яго абавязкі выконвае іншы намеснік старшыні аблвыканкама - Канюшка Андрэй Васільевіч (займаецца пытаннямі эканомікі - заўв.). Звяртацца непасрэдна па сельскагаспадарчых праблемах лепш наўпрост да Руслана Глушко, старшыні камітэта сельскай гаспадаркі і харчавання.

Паводле некаторых звестак, на вакантную пасаду ў аблвыканкаме разглядаецца кандыдатура старшыні Рэчыцкага райвыканкама Віталя Панчанкі. Але гэтую інфармацыю ў аблвыканкаме не каментуюць.

Мікалуцкі А.В. нарадзіўся ў 1962 годзе ў Шклоўскім раёне Магілёўскай вобласці. У 1980 - 1982 гадах служыў у Савецкім войску.

Пасля заканчэння Жыліцкага сельгастэхнікума Магілёўскай вобласці працоўны шлях пачаў брыгадзірам трактарнай брыгады калгаса «Абарона краіны» Рэчыцкага раёна. У 1991 годзе скончыў Беларускую сельскагаспадарчую акадэмію. Працаваў намеснікам старшыні, сакратаром парткама, галоўным аграномам, у 2008 - 2009 гадах - дырэктарам КСУП «Абарона краіны». З 2009 да 2013 года - генеральны дырэктар ААТ «Рэчыцкі камбінат хлебапрадуктаў», у 2013 - 2015 годзе - старшыня Жыткавіцкага райвыканкама. 23 снежня 2015 года прызначаны першым намеснікам старшыні Гомельскага аблвыканкама. Узнагароджаны медалём «За працоўныя заслугі».