Колькі хочуць зарабіць на аўтамабілістах у Беларусі

Навінкі ад BelToll.

У Беларусі плануюць скасаваць збор за праезд па дарогах агульнага карыстання, які плацілі ўладальнікі замежных грузавікоў і аўтобусаў у пунктах пропуску праз дзяржаўную мяжу, і павялічыць тарыфы за карыстанне платнымі дарогамі, піша zautra.by.

Паступленні ад гэтага збору нязначныя - у 2018 годзе яны складуць прыкладна 9 мільёнаў рублёў, патлумачыла такую пастанову намесніца міністра падаткаў і збораў Эла Сяліцкая.

Узамен гэтага збору прапануецца падвысіць кошт праезду па платных дарогах у сістэме BelToll. У гэтым годзе ўлады хочуць зарабіць на платных дарогах, 196,7 мільёнаў рублёў.

У 2017 годзе збор за праезд аўтамабільных транспартных сродкаў замежных дзяржаў па аўтамабільных дарогах агульнага карыстання Беларусі склаў 16,5 мільёнаў рублёў. У гэтым - крыху больш за 9 мільёнаў. Але нават гэтую суму давядзецца неяк кампенсаваць, папоўніўшы дарожны фонд іншымі даходамі альбо павялічыўшы субвенцыі з бюджэту.

Дарогі ўвесь час псуюцца і патрабуюць рэгулярнага сэрвісу для падтрымання іх стану. Калі знікае артыкул аб аплаце замежнікамі збору, які, паводле ідэі, ішоў на абслугоўванне дарог, то нейкім чынам зніжэнне даходаў належыць кампенсаваць. Адпаведна адбудзецца змена фінансавых плыняў, разважае дырэктар кампаніі ЭТС Кансалт Павел Астапеня.

- Відавочна, што гэтая частка павінна легчы на плечы аўтамабілістаў. Ва ўсім свеце абслугоўванне дарог закладзена ў тым ліку ў кошт паліва, - кажа ён.

Калі падвышаныя тарыфы за карыстанне платнымі дарогамі не кампенсуюць скасаваны збор, то гэтыя выдаткі лягуць на бюджэт, а значыць, на плечы ўсіх падаткаплатнікаў.

У патэнцыйным росце кошту платных дарог суразмоўца« Заўтра тваёй краіны» не бачыць вялікіх праблем. Краіны на розных умовах выконваюць паслугі камфартабельных дарог. Адзін з найбольш распаўсюджаных прыкладаў, калі за іх плацяць усе, хто імі карыстаецца.

- Гэта нармальная практыка аплаты за паслугу - табе робяць дарогу добрай якасці, а ты, будзь добры, заплаці за тое, што па ёй ездзіш, - адзначае экспэрт.

Плюсы ад гэтага відавочныя, аўтамабілісты атрымліваюць сэрвіс больш высокай якасці, што праяўляецца ў большай хуткасці перамяшчэння, скарачэнні часу на рух.

Але, як правіла, краіны прапануюць альтэрнатыву для тых, хто не хоча ці не можа сабе дазволіць плаціць за аўтабан, - аб'язныя шляхі не такой высокай якасці. І тады ў кіроўцаў ёсць права выбару.

- Каб сказаць дакладна, выгадна пакідаць аўтамабільны збор для замежных грамадзян або адмовіцца ад яго, трэба сабраць і прааналізаваць усю інфармацыю за мінулыя гады. Але калі такі крок прымаюць, напэўна, дзяржаўныя спецыялісты ўжо палічылі, што так будзе выгадней, - кажа Павел Астапеня.

Сярод схаваных выгод такой пастановы можна назваць зменшаная колькасць перашкод для турыстаў, якія прыязджаюць вялікімі групамі, а значыць, рост прывабнасці краіны для падарожнікаў. А таксама магчымы рост транзітных маршрутаў грузаперавозак.