Воўк уцёк з Беларусі і завёў сям'ю ў Польшчы

Воўк па мянушцы Руды асеў у лясах на ўскраіне Мазавецкага ваяводства на паўдарозе да Варшавы.

У лістападзе 2017 года навукоўцы надзелі на пяць ваўкоў, якія жывуць у Белавежскай Пушчы, GPS-нашыйнікі, якія дазваляюць адсочваць іх перасоўванне. З таго часу воўк па мянушцы Міхась сышоў ва Украіну. Цяпер стаў вядомы лёс яшчэ аднаго ваўка-эмігранта па мянушцы Руды, які эміграваў у Польшчу, піша vouk.by.

У студзені 2018 года Руды пераплыў раку Нараў і сышоў у Польшчу. За два дні ён прайшоў 50 кіламетраў. У выніку Руды асеў у лясах на ўскраіне Мазавецкага ваяводства на паўдарозе да Варшавы.

Чаму воўк сышоў у Польшчу? Магчыма, ён не змог знайсці сабе самку або яго патурбавалі паляўнічыя. Можна дапусціць, што воўк быў не мясцовы і выпадкова трапіў на тэрыторыю пушчы. У любым выпадку, у Польшчы паляванне на ваўкоў забароненае, таму Руды будзе адчуваць сябе больш камфортна.

Даследчык Мацей Шэўчык пабываў у месцах, адкуль Руды «адпраўляў» больш за ўсё сігналаў (а значыць, дзе ён праводзіў больш за ўсё часу), і прыйшоў да высновы, што Руды стаў бацькам некалькіх ваўчанят. Зрэшты, канчатковы адказ, хто з'яўляўся бацькам гэтых ваўчанят (Руды або іншы воўк са зграі, да якой ён мог далучыцца), дасць генетычны аналіз.