Беларусы скінуліся на дапамогу сям'і з Лоева, у якой забралі 3-месячнага першынца
48- 21.08.2018, 16:08
- 42,735
Чыноўнікі скарысталіся дэкрэтам Лукашэнкі №18, які супярэчыць Канстытуцыі.
Жыхарка Лоева Алеся Фаміных чакае вяртання свайго 3-месячнага сына, якога забрала ў прытулак дзяржава - праз беднасць бацькоў, паведамляе «Радыё Свабода». Пасля публікацый у СМІ неабыякавыя арганізацыі і беларусы дапамаглі бацькам.
Хто і як дапамог?
Юрыдычна. Праваабаронца Леанід Судаленка дапамог Алесі Фаміных скласці скаргу на імя старшыні Лоеўскага райвыканкама Веранікі Байковай - на дзеянні камісіі ў справах непаўналетніх.
«Гаворка ідзе пра неканстытуцыйнае адабранне дзіцяці з сям'і. Такое адабранне магчымае толькі паводле судовай санкцыі. Тут суд не дазваляў забіраць 3-месячнага хлопчыка, а чыноўнікі скарысталіся дэкрэтам №18. Ён супярэчыць Канстытуцыі», - кажа праваабаронца.
У скарзе маладая маці просіць райвыканкам скасаваць пастанову і вярнуць Максіма, а таксама зняць з бацькоў статус «абавязаныя асобы».
Леанід Судаленка нагадаў, што міжнароднае права забараняе ўсе тыпы дыскрымінацыі, у тым ліку паводле маёмаснай прыкметы. Менавіта праз беднасць чыноўнікі адабралі дзіця.
Маладую сям'ю ўжо наведалі судовыя выканаўцы, якія абавязалі Алесю і Андрэя выплаціць сумарна дзяржаве 280 рублёў за ўтрыманне іх сына ў Доме дзіцяці.
Маральна. «Мне тэлефанавалі шмат людзей, выказвалі падтрымку, абураліся дзеяннямі чыноўнікаў, абяцалі дапамагчы грашыма і рэчамі», - адзначыла Алеся.
Матэрыяльна. Многія людзі адгукнуліся на патрэбы маладой сям'і і пералічылі грошы на рахунак Алесі. Мясцовая ўлада запатрабавала, каб сям'я палепшыла жыллёвыя ўмовы, памяняла газавую пліту, правяла водаправод. Алеся і яе грамадзянскі муж Андрэй зрабілі сціплы рамонт, адрамантавалі печку і комін, набылі вазок, дзіцячыя рэчы, новую пліту. На водаправод не выстарчыла грошай, бо дзяржава абавязала бацькоў аддаваць грошы на ўтрыманне Максіма ў Доме дзіцяці.
На правядзенне водаправода 21 жніўня сродкі пералічыла Дабрачынная каталіцкая місія «Карытас-Міласэрнасць».
Rotary Club Minsk Сity цяпер займаецца зборам гуманітарнай дапамогі для сям'і - прадуктаў, цёплых рэчаў дзіцяці і маці, абутку, гігіенічных сродкаў.
«Да верасня мы прывязем дапамогу сям'і. Таксама мы будзем непасрэдна быць на сувязі з органамі апекі на тэму, як можна сістэмна падысці да развязання пытання «стварыць усе неабходныя ўмовы для знаходжання кожнага дзіцяці з маці», - сказала старшыня Rotary Club Minsk Сity Алена Бандарэнка.
Мясцовыя чыноўнікі наведалі сям'ю з чарговай камісіяй
21 жніўня дом Алесі і Андрэя зноў наведала камісія з выканкама. Са слоў Алесі, чыноўнікі абяцалі, што як толькі да дома будзе падведзеная вада - Максіма аддадуць. Мясцовыя камунальныя службы абяцаюць, што заўтра, 22 жніўня, пачнуць работы ў правядзенні водаправода.
Да цяжарнасці Алеся працавала прыбіральшчыцай, атрымлівала 200 рублёў. Яе грамадзянскі муж Андрэй не працаваў, стаяў на ўліку ў цэнтры занятасці. На новай працы, куды маладзён уладкаваўся рабочым, ён мае заробак блізу 200 рублёў. З гэтых грошай павінен цяпер аддаваць 70% на ўтрыманне сына.
Чыноўнікі наракалі на «запушчаны агарод». У Алесі была складаная цяжарнасць, яна шмат разоў ляжала ў лякарні. Пасля ў нованароджанага выявілі парок сэрца - таму маці з сынам больш за два месяцы правялі ў лякарні. Потым Максіма забралі ў Дом дзіцяці. Цяпер маладой маці дазваляюць бачыць немаўлятка толькі паўгадзіны на дзень.
Максім на пастанаўленне Лоеўскага райвыканкама стаў «непаўналетнім, які мае патрэбу ў дзяржаўнай абароне», сям'я - «сацыяльна-праблемнай», бацькі - «абавязанымі асобамі».