У Беларусі будуюць новыя ЛПП для «дармаедаў»?
16- 21.08.2018, 14:51
- 31,079
Інфармацыя пачала з'яўляцца пасля падпісання дэкрэта №1.
Актывіст «Еўрапейскай Беларусі» Максім Вінярскі апублікаваў у «Фэйсбуку» інфармацыю, атрыманую ад сукамернікаў у турме на вуліцы Акрэсціна. З іх слоў, у Беларусі пасля новага «Дэкрэта аб дармаедах» ствараюцца новыя ЛПП.
«Яшчэ ў траўні, падчас адбыцця адміністрацыйнага арышту ў ЦІП, раней судзімы за крадзеж сукамернік раcпавёў, што нібыта ў 2017 годзе з калоніі пад Наваполацкам вывезлі ўвесь спецкантынгент у іншыя калоніі ў чаканні масавых арыштаў. Падчас майго апошняга арышту, двое сукамернікаў, асуджаных за парушэнне нагляду, распавядалі, што сёлета будуюцца некалькі новых ЛПП - для будучых дармаедаў», - піша Максім Вінярскі.
Інфармацыю аб стварэнні новых ЛПП альбо пашырэнні ўжо наяўных паведамляюць і іншыя актывісты, якія раней адбывалі адміністрацыйныя арышты. Таксама пра гэта ў сакавіку заяўляў міністр унутраных спраў Шуневіч.
Камісіі, створаныя для выяўлення «дармаедаў» і ўжо названыя ў народзе «тройкамі», надзеленыя правам «прымаць пастановы аб накіраванні працаздольных непрацуючых грамадзян, якія вядуць асацыяльны лад жыцця, у лячэбна-працоўныя прафілакторыі». Пры гэтым крытэры «асацыяльнага ладу жыцця» нідзе не прапісаныя. Фактычна ў ЛПП можа трапіць хто заўгодна.