У Мёрскай лякарні з пацыентаў бяруць грошы за падсілкоўванне тэлефонаў

Акрамя таго, ёсць прэйскурант і на працу тэлевізара, планшэта, гатавальніка вады і іншых электрапрыбораў.

У канцы траўня ў Мёрах здалі новы будынак лякарні. Разам з ім з'явілася і новая платная паслуга - цяпер з пацыентаў, якія ляжаць у стацыянары, бяруць грошы за падсілкаванне тэлефонаў, піша tut.by. У медычнай установе сцвярджаюць, што ўсё законна.

Пра новую платную паслугу распавяла адная з пацыентак лякарні.

- Днямі паступіла ў аддзяленне. Падчас абыходу медсястра паведаміла, што калі камусьці трэба будзе падсілкаваць тэлефон, то за гэта давядзецца заплаціць 50 капеек, - распавядае спадарыня. - Наколькі правамерна браць з пацыентаў плату за гэта?

Журналісты звярнуліся па каментар да кіраўніцтва лякарні. Там растлумачылі, што ў іх сапраўды цалкам афіцыйна існуе такая платная паслуга. Акрамя таго, ёсць прэйскурант і на працу тэлевізара, планшэта, гатавальніка вады і іншых электрапрыбораў.

- Так, у нас ёсць прэйскурант платных паслуг, на падставе якога за гадзіну працы блока сілкавання для мабільнага тэлефона мы спаганяе плату 23 капейкі, - кажа намесніца галоўнага лекара медыцынскай часткі Мёрскай цэнтральнай раённай лякарні Святлана Бірукова. - Гэты прэйскурант зацверджаны з 1 верасня 2017 года. Усе аплаты праводзяцца афіцыйна, праз касавы апарат. Людзі самі падлічваюць, колькі гадзін падсілкоўвалі тэлефон, а потым ідуць і плацяць.

Са слоў Святланы Біруковай, часам пацыенты не хочуць ісці аплачваць паслугі самі. Касавы апарат знаходзіцца ў паліклініцы, а гэта іншы будынак.

- Таму старшая медыцынская сястра збірае аплату, нясе ў іншы будынак і праводзіць усё праз касавы апарат, а потым у той жа дзень прыносіць чэкі, - тлумачыць намесніца. - Усе чэкі ў нас таксама захоўваюцца і ў электронным варыянце, і ў папяровым. Акрамя таго, вядзецца журнал, куды ўсё запісваецца: хто, якую суму і за што заплаціў.

Святлана Бірукова падкрэсліла, што «пацыенты плацяць нават больш нізкім тарыфам, чым гэта павінна каштаваць».

- Гэта няўлічаная электраэнергія, яна не даецца проста так лячэбным установам, - кажа медык. - Ёсць расцэнкі на працу і іншых прыбораў. Да прыкладу, гадзіна карыстання тэлевізарам, ноўтбукам або планшэтам каштуе 11 капеек, гэта ўжо з ПДВ. Радыёпрымача - 8 капеек. Электрачайнік, як і блок сілкавання для мабільнага, - 23 капейкі.