У Беларусі ўводзяць электронныя працоўныя кніжкі

Новаўвядзенне дазволіць аператыўна знаходзіць «дармаедаў».

Улады надумалі ўзмацніць кантроль за прадпрыемствамі, якія плацяць працаўнікам заробак ніжэйшы за мінімальны, і прыспешыць арганізацыі з падачай звестак аб звольненых і прынятых. Гэта прадугледжана пастановай Саўміна ад 9 жніўня 2018 года № 589. Гэтыя змены ўвойдуць у дзеянне з 1 студзеня 2019 года.

Адно з новаўвядзенняў - узмацніць кантроль за арганізацыямі, якія плацяць сваім работнікам заробкі ніжэйшыя за мінімальны заробак (305 рублёў). Для гэтага працадаўцы павінны будуць падаваць звесткі аб суме выплат (даходу), якія ўлічваюцца пры прызначэнні пенсіі, і страхавых унёскаў (формы ПУ-3) штоквартальна, а не раз на год, як цяпер. На гэты крок пайшлі праз тое, што пры праверках спецыялісты Дэпартамента дзяржаўнай інспекцыі працы выяўляюць выплаты заробкаў ніжэйшыя за мінімальныя.

Нагадаем, у 2017 годзе вырасла колькасць арганізацый, якія плацілі работнікам заробак ніжэйшы за мінімальны (з 1 студзеня гэтага года - 305 рублёў). Такіх прадпрыемстваў у мінулым годзе было 163 (ў 2016 годзе - 105). Больш за ўсё такіх арганізацый у Віцебскай вобласці. За гэтыя парушэнні штраф атрымалі 152 службовыя асобы на суму 9,5 тысячы рублёў.

Яшчэ адно змяненне - прадпрыемствы павінны будуць больш аператыўна падаваць звесткі аб звольненых і прынятых работніках (форма ПУ-2). Цяпер гэтыя звесткі трэба паведамляць адзін раз на квартал цягам месяца, наступнага за справаздачным кварталам. Гэты тэрмін скарацілі да 10 рабочых дзён з дня прыёму або звальнення з працы.

Гэта змяненне, як плануецца, дасць магчымасць атрымаць аператыўную інфармацыю пра беларусаў, занятых у эканоміцы, арганізаваць аўдыт вакансій (рэспубліканскі банк вакансій) з выкарыстаннем сродкаў аўтаматызацыі, а таксама «стварыць аснову для пераходу да электроннай працоўнай кніжкі (арганізаваць вядзенне ўліку пашыраных звестак аб працоўнай дзейнасці грамадзян)». Пра гэта раней гаварылася на адным з апошніх грамадска-кансультатыўных пасяджэнняў пры Мінпрацы.

Акрамя таго, наймальнікі будуць мець магчымасць атрымліваць пацвярджэнне ў онлайн-рэжыме звестак аб працоўнай дзейнасці прэтэндэнта - пасада, стаж, найменне працадаўцы і іншае. Цяпер у онлайн-рэжыме выдаюцца перыяды выплаты абавязковых страхавых унёскаў, неабходныя працадаўцу для вызначэння сумы дапамогі з прычыны часовай непрацаздольнасці або з прычыны цяжарнасці і родаў.