Мастак з-пад Горадні: 14 гадоў шакуе мясцовых жыхароў сваім мастацтвам

Міхаіл Тамп ператварыў свой вясковы домік у сапраўдную галерэю.

Міхаіл Тапм не круціцца ў багемным асяроддзі, не ладзіць выставы але размалёўвае даслоўна ўсё вакол сябе, ствараючы са свайго жытла сапраўдную мастацкую сядзібу, піша сайт тэлеканалу «Белсат».

Едучы праз вёску Канюхі, якая месціцца за 15 км ад Горадні, нельга не звярнуць увагу на шэраг яскравых карцін-плакатаў, якія проста стаяць у садзе. На старой яблыні вісіць белы конь з падковай, а пад ім надпіс «Конь мечтает о свободе, надоело в огороде». Побач Ленін з Купідончыкам і нейкай вядзьмаркай. За імі шымпанзэ, адзетае ў касцюм з гальштукам, з подпісам «О таком мечтают дамы, от него на сердце шрамы». На будынку вясковай хаты красуецца расейскі спявак Грыгорый Лепс.

Відаць, тут жыве такі ж неардынарны чалавек, – падумалі мы і пагрукаліся ў хату. Дзверы адчыніла жанчына, якая ахвотна правяла нас у пакой да гаспадара. На ўваходзе вісіць надпіс «Если к нам пришел с добром, кофейку тебе нальём». Мы з дабром, таму праходзім унутр.

«14 гадоў шакую мясцовых сваім мастацтвам»

Гаспадаром хаты аказаўся гарадзенец Міхаіл Тамп, які ўжо 14 гадоў жыве ў Канюхах. Праз матэрыяльныя цяжкасці разам з жонкай Тамарай, яны пераехалі ў вёску. Пакуль Міхаіл малюе, Тамара гадуе кабачкі, агуркі ды памідоры. Да Канюхоў мастак дзесяць гадоў пражыў у Менску. Вучыўся на архітэктурным аддзяленні, якое не скончыў. Працаваў мастаком у парку Чалюскінцаў, пасля чаго з’ехаў і некалькі гадоў на замову распісваў касцёлы.

«Тамп-Трамп, – жартуе Міхаіл, – Гэта эстонскае прозвішча. Мой бацька эстонец, а маці паходзіць з вёскі Благое Ленінградскай вобласці. Хоць сам я нарадзіўся ў Горадні ў 1960-м годзе. А цяпер тут жывём. 14 гадоў шакую людзей сваім мастацтвам».

Пра сябе мастак распавядаць саромеецца. Некалькі гадоў назад ён перажыў мікраінсульт, які паўплываў на яго вымаўленне і паходку. Больш ахвотна гаспадар паказвае свае творы, развешаныя па ўсёй хаце. Каля вакна стаіць стол з мноствам пэндзлікаў і фарбаў – гэта «майстэрня».

«Я вольны мастак»

Міхаіл Тапм малюе ў стылі поп-арт. У канцы 1950-60-х гэты кірунак у мастацтве стаў папулярным у Заходняй Еўропе і ЗША. За аснову карціны мастакі бяруць вобразы прадуктаў спажывання або масавай культуры, якія змяшчаюць у іншы кантэкст.

У пакоі Міхаіла вісіць партрэт Грыгорыя Лепса.

«Вельмі люблю гэтага спевака, паважаю. А чым натхняюся? Я вольны мастак. Часам проста хочацца нешта зрабіць, тады ўжо абдумваю, працую над тэмай. У кожную карціну частачку сябе ўкладваю. Прыдумваю гумарыстычныя подпісы, як бачыце, вершаваныя. Увогуле мне вершы вельмі лёгка даюцца. За паў гадзіны магу вам паэму скласці. Людзі нават прыязджаюць, каб я для іх пісаў тосты ці пажаданні. Кіраўнік фермы нядаўна быў, складаў яму верш на выпускны ў дачкі», – кажа Міхаіл.

Падчас размовы мастак з жалем прызнаў, што карціны прадаюцца слаба. Паколькі жывуць яны ў вёсцы без падключэння да інтэрнэту, мала хто ведае пра творчасць Міхаіла Тампа.

«Часам мясцовыя прыходзяць, але больш з цікаўнасці. Большасць не разумее маіх пасылаў. Часам людзі, праязджаючы праз вёску, спыняюцца. Але мы да ўсяго вельмі проста ставімся. Раней свае творы я прадаваў у Горадні пад Моладзевым цэнтрам, часам на Скідзельскім рынку, цяпер ужо цяжэй даязджаць», – тлумачыць мастак.

На развітанне ў вочы кінулася цытата на ўваходзе, якая адлюстроўвае, відаць, жыццёвае крэда гэтага творчага чалавека.

«Надоел бамбук, Китай. Канюхи для панды рай. Драников наемся, буду слушать Лепса. И о вечном вам скажу: вновь без денег я сижу».

Наведаць мастака можна па адрасе в. Канюхі, Чырвонаармейская 23.