ЗША хочуць змяніць праект санкцый, каб прычыніць шкоду толькі РФ
3- 20.08.2018, 15:20
- 17,248
ЗША хочуць дабіцца таго, каб эканамічная шкода была абмежаваная расейскай эканомікай.
Законапраект, накіраваны на прадухіленне ўмяшання Расеі ў прамежкавыя выбары ў ЗША, хутчэй за ўсё, перапішуць, каб мінімізаваць ненаўмысныя наступствы для глабальных эканомік у выпадку ўвядзення жорсткіх аўтаматычных санкцый да дзяржаблігацый і нафтагазавай галіны, паведамляе finanz.ru са спасылкай на Bloomberg.
«Мы хочам дамагчыся таго, каб эканамічная шкода была абмежаваная расейскай эканомікай, наколькі гэта магчыма, а пабочны эфект быў нязначны», - сказаў сенатар Крыс Ван Холен, дэмакрат ад штата Мэрылэнд.
Законапраект, прапанаваны ў студзені Ван Холенам і рэспубліканцам ад штата Фларыда Марка Рубіё, прадугледжвае ўвядзенне санкцый, калі дырэктар Нацыянальнай выведкі Дэн Коўтс пацвердзіць, што Масква ўмешваецца ў намечаныя на лістапад выбары ў ЗША.
Праект прадугледжвае санкцыі ў дачыненні да новай суверэннай пазыкі РФ і блакаванне пэўных угодаў з актывамі, у тым ліку расейскіх нафтагазавых кампаній, уключаючы ПАТ «Газпром» і ПАТ «Раснафта». Пад санкцыі таксама патрапяць расейскія банкі, горназдабыўныя кампаніі ды чыноўнікі.