Вахтанг Кікабідзэ: Хай Жыве вільна Україна!

19 ліпеня народнаму артысту Грузіі, спеваку і актору Вахтангу Кікабідзэ споўнілася 80 гадоў.

Свой юбілей ён адсвяткаваў двума канцэртамі ў батумскім дзяржаўным музычным цэнтры - 18 і 19 жніўня.

Украінскі журналіст, заснавальнік інтэрнэт-выдання "Гордон" Дзмітрый Гордан і галоўная рэдактарка выдання Алеся Бацман на запрашэнне Кікабідзэ прыляцелі ў Батумі, каб павіншаваць артыста з днём нараджэння.

"Вахтанг Канстанцінавіч Кікабідзэ не толькі вялікі артыст, не толькі вялікі чалавек, але яшчэ і сапраўдны мужчына. Калі агрэсар, які чатыры гады топча тэрыторыю Украіны і забівае ўкраінцаў, прыйшоў у 2008 годзе ў Грузію, Вахтанг Кікабідзэ сказаў: "Я больш не паеду ў Расею", і слова сваё стрымаў. Таму хай жыве вялікая і адзіная Грузія, слава Украіне і хай гэты вялікі грузін хоча Ларысу Іванаўну яшчэ шмат дзясяткаў гадоў!" - сказаў Гордан.

Ягоныя словы зала сустрэла гучнымі воплескамі і выкрыкамі "Героям слава!". "Хай Жыве вільна Україна!" - адказаў на віншаванне Кікабідзэ.

Кікабідзэ нарадзіўся 19 ліпеня 1938 года ў Тбілісі. Асаблівая папулярнасць прыйшла да яго пасля ролі ў фільме Георгія Данэліі "Міміно". Гэтая акторская праца прынесла Кікабідзэ ў 1978 годзе Дзяржаўную прэмію СССР.

Пасля расейска-грузінскага канфлікту ў 2008 годзе Кікабідзэ скасаваў свае канцэрты ў Маскве і з таго моманту больш не наведваў Расею. Артыст падтрымліваў Майдан ва Украіне і актыўна выказваў сваю праўкраінскую пазіцыю.