Лукашэнка спіхнуў віну за павышэнне аплаты ЖКП да 100% на ўрад
35- 18.08.2018, 19:05
- 35,073
Дыктатар заявіў, што гэты ўрад, а не МВФ прапаноўваў давесці да 100% аплату жыллёва-камунальных паслуг.
Пра гэта Лукашэнка заявіў, каментуючы кадравыя перастаноўкі ва ўрадзе.
Паводле ягоных словаў, не з падачы МВФ, а «з падачы дзеячаў ва ўрадзе» пачалі гучаць прапановы аб тым, каб імгненна падняць да 100% аплату насельніцтвам паслуг ЖКГ, прыватызаваць усю дзяржаўную ўласнасць.
«Што б мы атрымалі? Мінімум - незадаволенасць народа і нявыплаты. Людзі не змаглі б аплаціць той узровень камунальных паслуг, які быў бы выстаўлены. Таму дакладна быў дадзены мною адказ на гэтае пытанне падчас яшчэ перадвыбарнай кампаніі: пры росце заробку мы будзем паволі павялічваць плату за камунальныя паслугі з боку насельніцтва. І дамовіліся - $ 5 штогод. Не, гэтага мала, і пачынаецца валаводжанне на ўвесь свет. Так вяліся перамовы з МВФ. «Прэзідэнт» ставіць адну задачу, а тут ізноў спрабуюць праціснуць ва ўрадзе, ды і Нацыянальным банку, не кіем, дык палкаю гэтую так званую ліберальную пазіцыю, бязглуздую пазіцыю», - адзначыў беларускі дыктатар.