Як будзе мяняцца сістэма падліку балаў на ЦТ

Балы за заданне абітурыент будзе ведаць загадзя.

Сёлета Рэспубліканскі інстытут кантролю ведаў апрабаваў новую методыку падліку вынікаў ЦТ. Як паведамляе tut.by, пра гэта на прэс-канферэнцыі распавяла першая намесніца дырэктара РІКВ Наталля Вайцэховіч.

Перш за ўсё Наталля Вайцэховіч удакладніла: вынікі ЦТ гэтага года ацэньваліся згодна з ранейшай методыкай, «зацверджанай загадам Міністэрства адукацыі і выкарыстоўвалася цягам больш чым 12 гадоў».

- Мы можам казаць пра мадэльную апрабацыю. Вынікі ЦТ гэтага года былі разлічаныя і паводле ранейшай, і паводле новай методыкі.

У чым яна палягае? Галоўнай перавагай новай сістэмы падліку Наталля Вайцэховіч называе празрыстасць.

- Вынікі будуць больш празрыстымі. Кожнаму заданню з варыянту тэсту будзе прысвойвацца першасны бал, які абітурыенты змогуць убачыць яшчэ да пачатку цэнтралізаванага тэставання. Ён будзе вызначаны і зацверджаны спецыфікацыяй, якую штогод зацвярджае Міністэрства адукацыі. Затым у працэсе праверкі работ абітурыентаў будуць уведзеныя каэфіцыенты. Далей будзе разлічаны тэставы выніковы бал. Свой ранг абітурыенты змогуць убачыць у нас на сайце.

Методыка, падкрэсліла Наталля Вайцэховіч, у сусветнай практыцы не новая: яна выкарыстоўваецца ў многіх краінах. Выкарыстоўваць яе ў Беларусі могуць пачаць ужо налета.

- У выніках мадэльнай апрабацыі мы ўбачылі шмат плюсаў. Пытанне знаходзіцца ў стадыі разгляду.

Цяпер, нагадаем, пры ацэнцы кошту пытання ўлічваецца ў тым ліку і тое, колькі чалавек адказалі на яго правільна.