Мост у Генуі можа абрынуцца яшчэ больш

Трэскаецца адзін з пілонаў.

Адна з ацалелых апор зруйнаванага ўчора моста Марандзі ў Генуі трэскаецца і таксама можа ўпасці.

Пра гэта паведамляе La Stampa.

Адна з апор моста знаходзіцца проста паміж жылымі дамамі, жыхароў якіх учора эвакуявалі. Большасць з іх правялі ноч у гуманітарным цэнтры, падрыхтаваным мясцовымі ўладамі.

Сёння раніцай жыхары хацелі вярнуцца ў свае дамы, але пажарныя пакуль не дазваляюць ім гэтага зрабіць праз небяспеку новага абвальвання адной з апор. Відавочцы сцвярджаюць, што трэшчына ў апоры здаецца значна большай, чым учора.

Між тым, паліцыя ўсё больш пашырае так званую «чырвоную зону», закрывае тэрыторыю, якая можа прадстаўляць рызыку для людзей і транспартных сродкаў. Пакуль немагчыма сказаць, калі мясцовыя жыхары змогуць вярнуцца дадому.

Паводле апошніх звестак, у выніку руйнавання секцыі моста загінулі 39 чалавек, пошукавая аперацыя прадаўжаецца.

Частка моста Марандзі даўжынёй блізу 100 метраў абрынулася 14 жніўня блізу поўдня. Упала секцыя, якая праходзіла над чыгуначнымі рэйкамі і ракой Пальчэверай.

Траса А10, на якой знаходзіцца мост, перакрытая. Мост Марандзі пабудаваны ў 1960-х гадах на захад ад цэнтра Генуі. Яго даўжыня складае 1182 метры, вышыня - 90 метраў.