«Ледзь адбыла змену»: што кажуць працаўнікі прадпрыемства вырошчвання грыбоў, якія трапілі ў лякарню

СК правярае прадпрыемства пад Крычавам.

У рэдакцыю tut.by звярнулася дачка адной з жанчын, якая працавала на прадпрыемстве вырошчвання грыбоў шыітаке пад Крычавам. Цяпер яе мама ў лякарні. «Адразу казалі: атручэнне, потым астма, цяпер гіпертанічны крыз, - пералічвае дзяўчына. - Але які крыз, у мамы ніколі не было праблем з ціскам?»

12 жніўня чытач паведаміў у рэдакцыю, што чацвёра супрацоўнікаў прадпрыемства «Інфэн» патрапілі з атручваннем у рэанімацыю. «Інфэн» - інвестпраект, які запусцілі ў ліпені гэтага года на тэрыторыі перадыслакаванай вайсковай часткі ў Крычаўскім раёне. Тут вырошчваюць грыбы шыітаке.

Таццяна (на просьбу родных імя змененае) трапіла ў Крычаўскую цэнтральную раённую лякарню 8 жніўня. У той дзень, узгадвае яе дачка Вольга, праз задышку мама ледзь адпрацавала змену. Увечары родныя намаглі, каб жанчына звярнулася на ФАП.

- Там ёй стала горш: зводзіла рукі, стан быў амаль несвядомы. Яна не разумела, што адбываецца, - успамінае словы мамы дачка. - Мясцовы лекар выклікаў хуткую.

Таццяну павезлі ў Крычаўскую ЦРБ. Паўтара дня яна праляжала ў рэанімацыі. Затым яе перавялі ў тэрапію.

- Першапачаткова лекары тлумачылі, што ў яе абпаленыя дыхальныя шляхі і згустак у лёгкім. Меркавалі, гэта праз атручванне, - прадаўжае суразмоўца. - Пасля кропельніц у мамы на твары плямамі пайшлі пачырваненні, на руках - сып. Медыкі казалі, выходзяць таксіны.

Вольга наведвала маму ў пятніцу, 10 жніўня. З лекарамі сустрэцца не здолела. У тэрапіі, прадаўжае дзяўчына, кропельніцы маме пакінулі. У Таццяны быў стан «страчанага чалавека». Цяпер пацыентцы лягчэй. У выхадныя лекары сказалі жанчыне, што ў яе астма.

- Калі яе прывезлі ў лякарню, ціск у яе быў 200 на 180, - прадаўжае дачка. - Але яна ніколі не скардзілася ні на ціск, ні на задышку! Лекары кажуць: падазрэнне на астму. Але хіба ёсць такія сімптомы пры астме?

Са слоў Вольгі, яе мама гутарыла і з іншымі шпіталізаванымі супрацоўнікамі прадпрыемства.

- Жанчыны, якія з ёй ляжаць, адчувалі боль у грудзях, было цяжка дыхаць, - перадае яна словы Таццяны. - Мама кажа, у іх такія ж прыкметы, як былі ў яе першапачаткова. Свае адчуванні яна апісвала на працы, адчуўшы такія сімптомы, людзі пайшлі на ФАП.

Ці быў у калегаў мамы такі высокі ціск і пачырваненне на твары, Вольга не ведае.

- Ім сказалі, што дыягназ высвятляецца, магчыма, ВРВІ.

- А як тлумачылі, што ўсе маглі заразіцца ВРВІ?

- Сказалі, яны працуюць з халоднай вадой у закрытым памяшканні. Выйшлі на сонца, змена тэмпературы - вось і захварэлі, - тлумачыць дзяўчына і дапаўняе. - На прадпрыемстве яны былі без спецадзення. Ні пальчатак, ні рэспіратараў - нічога ім не выдавалі.

Са слоў Аляксандра Плятнёва, галоўнага лекара Крычаўскай ЦРБ, стацыянарнае лячэнне атрымалі восем супрацоўнікаў прадпрыемства.

- Яны звярталіся ў розныя дні і паступалі з рознымі захворваннямі, - паведаміў суразмоўца. - Ніякай сувязі з атручваннем ні ў аднаго няма. Усе з захворваннямі.

Раней у адміністрацыі прадпрыемства «Інфэн» казалі, што ў шпіталь супрацоўнікі патрапілі праз ВРВІ і астму.

У Следчым камітэце паведамілі: па факце пагаршэння стану здароўя шэрагу работнікаў прыватнага прадпрыемства Крычаўскі раённы аддзел СК праводзіць праверку.

- Праца вядзецца ў цесным узаемадзеянні з установамі аховы здароўя і рэспубліканскім цэнтрам гігіены і эпідэміялогіі, - адзначыла Юлія Ганчарова, афіцыйная прадстаўніца Следчага камітэта. - Адзначу, што шпіталізаваныя людзі з рознымі дыягназамі. Паводле нашых звестак, адзін чалавек з рэанімацыі пераведзены ў тэрапію, назіраецца паляпшэнне здароўя астатніх.