Пратэстоўцы ў Арменіі запатрабавалі арышту былога прэзідэнта

Апаненты экс-прэзідэнта Арменіі Роберта Качарана сарвалі ягоную прэс-канферэнцыю.

У Ерэване прайшла акцыя пратэсту - удзельнікі мітынгу ля сцен Вышэйшай судовай рады Арменіі запатрабавалі звольніць суддзю, які адпусціў учора з-пад варты былога прэзідэнта Роберта Качарана. Сёння Качаран збіраўся выступіць перад журналістамі, але ягоныя праціўнікі ўварваліся ў залу і сарвалі прэс-канферэнцыю, паведамляе «Радыё Свабода».

Другі мітынг прайшоў таксама каля будынка Генпракуратуры Арменіі. Людзі патрабавалі неадкладна арыштаваць Качарана. Сярод удзельнікаў акцыі - сваякі загінулых падчас сутыкненняў пачатку сакавіка 2008 года.

Качарана арыштавалі ў канцы ліпеня. Яго абвінавацілі ў звяржэнні канстытуцыйнага ладу краіны. Пад вартай ён правёў два месяцы. 13 жніўня суд вызваліў яго, бо былы кіраўнік дзяржавы Качаран валодае недатыкальнасцю. Былы прэзідэнт Арменіі называе выстаўленыя яму абвінавачванні палітычна матываванымі.

Справа ў дачыненні да Качарана была распачатая праз сілавы разгон акцыі пратэсту пасля прэзідэнцкіх выбараў у 2008 годзе. Тады прыхільнікі саступілага Лявона Тэр-Петрасяна арганізавалі акцыю пратэсту і патрабавалі перагляду вынікаў галасавання. У сутычках з паліцыяй загінулі 10 чалавек. Качаран абвясціў надзвычайнае становішча, пратэсты ў краіне спыніліся.

Адным з арганізатараў мітынгаў 2008 года быў цяперашні прэм'ер-міністр Арменіі Нікол Пашынян. У 2010 годзе паводле абвінавачвання ў арганізацыі беспарадкаў яго прысудзілі да сямі гадоў калоніі. У траўні 2011 года Пашынян выйшаў на волю згодна з амністыяй.