Плата за паветра

Расейцаў чакае новы падатак.

Міністэрства фінансаў РФ прапануе ўвесці экалагічны падатак наўзамен платы за негатыўнае ўздзеянне на навакольнае асяроддзе, якая спаганяецца цяпер. Падатковыя стаўкі прапануецца ўстанавіць адпаведна з тыпамі забруджвальных рэчываў і класу небяспекі адкідаў вытворчасці і спажывання, піша gazeta.ru.

Мінфін Расеі прапануе ўвесці экалагічны падатак. Новым аднайменным раздзелам Падатковы кодэкс можа папоўніцца ўжо з 2020 года, гаворыцца ў матэрыялах да законапраекта, апублікаванага на сайце праектаў нарматыўных прававых актаў. Мяркуецца, што змены ўвойдуць у законнае дзеянне з 1 студзеня таго ж года.

Згодна са зводнай справаздачай да праекта закона, міністэрства прапануе ўвесці «экалагічны падатак наўзамен дзейнай цяпер непадатковай аплаце (плата за негатыўнае ўздзеянне на навакольнае асяроддзе». Мінфінансаў прызнала гэты механізм неэфектыўным.

Аб'ектам падаткаабкладання прызнаецца негатыўнае ўздзеянне ў выніку выкіду ў атмасфернае паветра, скіду ў водныя аб'екты сцёкавых вод забруджвальных рэчываў, а таксама ўтварэння, захоўвання, захавання, назапашвання, размяшчэння адкідаў вытворчасці і спажывання кожнага класа небяспекі.

«Падаткааплатнікі падлягаюць пастаноўцы на ўлiк у якасці падаткааплатніка экалагічнага падатку па месцы знаходжання аб'екта, які негатыўна ўздзейнічае на навакольнае асяроддзе, цягам 30 дзён з моманту яго пастаноўкі на дзяржаўны ўлік у адпаведнасці з заканадаўствам Расейскай Федэрацыі ў галіне аховы навакольнага асяроддзя», - гаворыцца ў законапраекце.

Падаткааплатнікамі экалагічнага падатку прызнаюцца арганізацыі і фізічныя асобы, у тым ліку індывідуальныя прадпрымальнікі, якія ажыццяўляюць на тэрыторыі Расейскай Федэрацыі, кантынентальным шэльфе і ў выключнай эканамічнай зоне гаспадарчую ці іншую дзейнасць, якая негатыўна ўздзейнічае на навакольнае асяроддзе.

«Пры ўтварэнні адкідаў, за выключэннем цвёрдых камунальных адкідаў, падаткааплатнікамі экалагічнага падатку прызнаюцца арганізацыі і фізічныя асобы, у тым ліку індывідуальныя прадпрымальнікі, пры ажыццяўленні якімі гаспадарчай і (або) іншай дзейнасці ўтварыліся адкіды», - гаворыцца ў праекце закона.

Як ужо было сказана, таксама падатак будзе брацца і ў выпадку засмечвання. Згодна з размешчаным у абмеркаваннях дакументам, пры ўтварэнні цвёрдых камунальных адкідаў падаткааплатнікамі падатку прызнаюцца рэгіянальныя аператары.

«Міжнародны досвед у адпаведных сферах дзейнасці: у шэрагу краін плата за забруджванне навакольнага асяроддзя спаганяецца ў выглядзе падатковай аплаты», - дадаецца ў зводнай справаздачы да праекта закона.

Пры гэтым прапанаваныя змены ў Падатковы кодэкс РФ устанаўліваюць падатковыя стаўкі згодна з тыпамі забруджвальных рэчываў і класам небяспекі адкідаў вытворчасці і спажывання.

Навацыі ў экалагічным падатку павінны стаць часткай больш глабальных змен. Раней урад абяцаў рэформу ўсіх непадатковых аплатаў. Павінен быць створаны адмысловы рэестр такіх збораў, а частка з іх пераведзеная ў падаткі і ўключаная ў Падатковы кодэкс.

У траўні гэтага года прэм'ер-міністр Расеі Дзмітрый Мядзведзеў даручыў Мінфіну і Мінэканамразвіцця прапрацаваць да 1 верасня пытанне аб непадатковых аплатах і забяспечыць баланс прыватных і публічных інтарэсаў.

«Мінфіну Расеі, Мінэканамразвіцця Расеі супольна з зацікаўленымі федэральнымі органамі выканаўчай улады ўнесці ва ўрад Расеі праект федэральнага закона, які прадугледжвае ўключэнне ў Падатковы кодэкс Расеі непадатковых аплатаў, якія маюць квазіпадатковы характар», - сказана ў даручэнні.

Таксама адзначаецца неабходнасць унесці змены ў федэральныя законы, якія рэгламентуюць такія аплаты, і ўстанавіць пераходныя раздзелы ў дачыненні да захадаў за іх няўплату.

Кіраўнік Расейскага саюза прамыслоўцаў і прадпрымальнікаў Аляксандр Шохін раней у інтэрв'ю «Газеце.Ru» распавядаў, што ў бізнэса ёсць спіс з 70 з лішнім аплатаў, і ёсць версіі Мінэканомразвіцця і Мінфіна, у якіх амаль 50 аплатаў, і выніковы пералік яшчэ трэба ўзгадніць.

«Для бізнэсу ўключэнне непадатковых аплатаў у Падатковы кодэкс дае плюс у тым, што гэта высокі ўзровень заканадаўства. А мінус у тым, што цяпер за нявыплату гэтых непадатковых аплатаў пагражае толькі адміністрацыйнае пакаранне. Але калі яны патрапяць у Падатковы кодэкс, пакаранне стане крымінальным. Таму нам важна паглядзець, ці з'яўляюцца гэтыя аплаты падаткамі, як нас пераконваюць некаторыя нашы апаненты. Напрыклад, экалагічны збор, утылізацыйны, «Платон» і гэтак далей, калі іх уводзілі, казалі пра асабліва мэтавы характар гэтых унёскаў», - казаў Шохін.