Лявон Вольскі намаляваў карціну для святара з Друі

Усе ведаюць Вольскага як харызматычнага музыку, але не менш таленавіты ён і як мастак.

Зорка беларускага року (і выбітны мастак) Лявон Вольскі стварыў палатно «Крушня» адмыслова для святара каталіцкага Траецкага прыходу ў Друі кс. Сяргея Сурыновіча, піша krynica.info.

Праца была перададзена Вольскім у Друю падчас IV Міжнароднага мастацкага пленэру, які праходзіў з 2 да 12 жніўня з удзелам шэрагу знакамітых айчынных мастакоў, якія працуюць у розных жанрах: ад класічнага рэалізму да канцэптуальнай абстракцыі.

Планавалася, што Лявон Вольскі наведае Друю асабіста і выступіць перад мастакамі з невялікім канцэртам, але планы змяніла занятасць музыкі. У якасці ўкладу ў стварэнне Друйскай калекцыі, якая фармуецца з твораў штогадовых пленэраў, рок-музыка перадаў кс.Сяргею Сурыновіч «Крушню», якая заняла цэнтральнае месца на вернісажы, якім 12 жніўня скончыўся пленэр.

Удзел у пленэрах у форме творчых выступаў знакамітых творцаў - традыцыя Друйскага форумаў жывапісу. У мінулыя гады да мастакоў прыязджалі Піт Паўлаў, Уладзімір Някляеў, Адам Глобус. У гэтым годзе кс.Сяргей Сурыновіч надумаў захаваць камерную атмасферу - мастакі працавалі без візітаў бліскучых гасцей, вынікам сталі больш за сотню створаных палотнаў, якія ўжо ўбачылі амаль тысяча наведвальнікаў.

Цікавасць гледачоў да палотнаў абумоўлены, сярод іншага, і вялікай колькасцю турыстаў, якія з'язджаюцца ў жніўні ў Браслаў на адпачынак на знакамітыя азёры. Даведаўшыся пра магчымасць убачыць работы жывапісу ў старадаўніх сценах манастыра, госці з розных куткоў Беларусі і з іншых краін наведваюць Друю.

- Вельмі рады, што праца Лявона Вольскага стала перлінай калекцыі. Усе ведаюць Вольскага як харызматычнага музыку, але не менш таленавіты ён і як мастак. Вельмі рады магчымасці пазнаёміць друйскую моладзь і з гэтай бокам ягонай творчасці, - распавядае кс. Сурыновіч.