Генадзь Фядыніч пра «справу РЭП»: Хлопцы, куды гэта варта? Гэта ні ў пяць, ні ў дзесяць

Лідар незалежнага прафзвязу пракаментаваў раптоўнае перапыненне ў судовым пасяджэнні.

Лідар РЭП Генадзь Фядыніч мяркуе, што адной з прычын перапынку з'яўляецца тое, што суд скончыў разглядаць рэчыўныя довады, піша praca-by.info:

- Больш ніякіх довадаў, якія тычыліся б 2011 года, у справе няма. Па-другое, суд, як вы памятаеце, даручаў пракуратуры разабрацца з ціскам на сведак, якія адмовіліся ад першапачатковых сведчанняў. З гэтымі сведкамі працавала пракуратура, і без дакументаў з высновамі пракуратуры не можа выносіцца прысуд.

Сведак паводле Справы прафзвязаў, якія заявілі пра ціск на іх падчас следства, забрала міліцыя

Лідар незалежнага прафзвязу мяркуе, што судовы працэс падышоў да канца:

- Яшчэ будзе час для спрэчак, для заявы хадайніцтваў; але я думаю, што суд цалкам можа скончыцца 15 жніўня, у крайнім выпадку - 16. Суддзя, магчыма, узяла сабе час, каб напісаць абвінаваўчую выснову.

Генадзь Фядыніч падкрэсліў, што суддзя падчас судовага разбору не выяўляла прадузятасці:

- Вядзе працэс досыць адэкватна: нейкія хадайніцтвы прымае, нейкія - адхіляе, дзесьці абвінаваўцаў ставіць на месца, дзесьці - абаронцаў. Але дае ўсім выказацца. Прэтэнзій да вядзення судовага разбору ў мяне няма. Пытанне ў іншым: калі б была довадная база, у якой нельга сумнявацца, то суд даўно б ужо скончыўся, цягам тыдня.

Старшыня РЭП не згодны са сцвярджэннем, што прафзвяз скарыстаўся судом, каб зладзіць сабе публічную кампанію ў СМІ:

- Яны самі: УДФР, следчыя органы - зладзілі гэтую кампанію! Следства прадэманстравала сваю некампетэнтнасць і непрафесіяналізм. Найбліжэйшыя прыклады: частка файлаў не адкрываецца, цэлыя дыскі на судзе не адкрываюцца; дазвол аб праслухоўцы дадзены на 15.07, а мяне праслухоўваюць 06.07, і ў судзе гэты дакумент зачытваюць! Хлопцы, куды гэта варта? Гэта ж ні ў пяць ні ў дзесяць.

Генадзь Фядыніч за асноўную рысу Справы прафзвязаў разглядае тое, што гэта - справа не пра камерцыйнае злачынства:

- І самае галоўнае: ні дзяржаўнае абвінавачанне, ні Следчы камітэт, ні суддзя - яны ўвогуле не разумеюць прыроду работы прафзвязу, у тым ліку і на міжнародным узроўні. Адна справа - калі ты затрымаў камерсанта, які не выплаціў падаткі. А тут зусім іншыя працэсы, іншыя ўзаемасувязі! Ні нявыплаты падаткаў, ні крадзяжу тут няма. Весці суд паводле шаблону тут не выпадае.

Генадзь Фядыніч сцвярджае, што прафзвязу РЭП ставяць у віну менавіта тое, што складае аснову ягонай дзейнасці:

- Мы праводзілі семінары - і будзем праводзіць; будуць прыязджаць людзі: гэта прафзвязная салідарнасць. Навучальныя семінары павінны праводзіцца, таму што прафзвяз РЭП хаця б часткова закрывае пралом, які стварыла дзяржава ў дачыненні да сваіх грамадзян. Таму што прававая непісьменнасць - паўсюдная, а дзяржава ніяк не навучае людзей, каб яны ведалі хоць бы свае працоўныя правы. Ніхто ж не будзе чытаць Працоўны кодэкс - патрэбна дзяржаўная палітыка. Дзяржава не навучаюць людзей іх правам. А прафзвяз РЭП - навучаў, і гэта ставіцца яму ў віну.