29 сакавiка 2024, Пятніца, 7:53
Падтрымайце
сайт
Сім сім,
Хартыя 97!
Рубрыкі

Рада БНР заклікае даць сумесны адпор рэжыму Пуціна

27
Рада БНР заклікае даць сумесны адпор рэжыму Пуціна

Менавіта пры падтрымцы Крамля Лукашэнка ўчыніў дзяржаўны пераварот.

Пра гэта Рада БНР заявіла ў сваім звароце:

- У гэтыя дні спаўняецца 10 гадоў вайне паміж Расеяй і Грузіяй у 2008 годзе.

Рада БНР канстатуе, што вайна стала вынікам замежнапалітычнай агрэсіі з боку Расеі, якая з пачатку 1990-х гадоў аказвала матэрыяльную і палітычную падтрымку сепаратысцкім утварэнням на тэрыторыі Грузіі, выкарыстоўвала свой міратворчы мандат для прыкрыцця гэтай падтрымкі і нарошчвання вайсковай сілы ў Паўднёвай Асеціі і Абхазіі.

Рада БНР падкрэслівае, што Расея нясе адказнасць таксама за падрыхтоўку і непасрэднае развязанне баявых дзеянняў у жніўні 2008 года.

Рада БНР падтрымлівае тэрытарыяльную цэласнасць Грузіі ў міжнародна прызнаных межах і выказвае сваю салідарнасць з народам Грузіі, які разам з беларусамі пакутаваў ад дзесяцігоддзяў савецкае акупацыі, а пасля распаду СССР быў вымушаны супраціўляцца агрэсіўнаму рэваншызму з боку Расеі.

Рада БНР звяртае ўвагу, што вайна 2008 года стала прадвеснікам вайны ва Украіне, якую пуцінская Расея развязала ў 2014 годзе.

Замежнапалітычная агрэсія постсавецкай Расеі стала вынікам недастатковай рашучасці міжнароднай супольнасці ў рэагаванні на ўмяшанне ў справы суседніх краін з боку Расеі, а таксама недастатковай увагі міжнароднай супольнасці да працэсаў дэмакратычнай трансфармацыі ў Расеі і іншых постсавецкіх краінах з пачатку дзевяностых гадоў.

Рада БНР звяртае ўвагу, што вайне ў Грузіі папярэднічаў дзяржаўны пераварот у Беларусі ў 1995-1996 гадах, які адбыўся пры падтрымцы Расеі і прывёў да ўсталявання прарасейскага аўтарытарнага рэжыму Аляксандра Лукашэнкі, адказнага за цэнзуру, фальсіфікацыю выбараў, масавыя парушэнні правоў чалавека і палітычныя рэпрэсіі, а таксама забойствы палітычных апанентаў.

Рада БНР звяртае ўвагу на тое, што пуцінская Расея працягвае ствараць пагрозу міжнароднай бяспекі і перш за ўсё суседнім краінам, у тым ліку Беларусі.

Рада БНР заклікае да міжнароднай салідарнасці і сумеснага адпору агрэсіўным дзеянням Расеі пад кіраўніцтвам рэжыму Уладзіміра Пуціна як на ўзроўні грамадзянскай супольнасці, так і на дзяржаўным узроўні.

Напісаць каментар 27

Таксама сачыце за акаўнтамі Charter97.org у сацыяльных сетках