Лукашэнка: У міністра выбар адзін - ці турма, ці сюды

Дыктатар зрабіў дзіўныя выказванні на інструментальным заводзе ў Воршы.

Лукашэнка жорстка крытыкаваў якасць работы мясцовых органаў улады і кіраўніцтва прамысловай галіны ў развіцці Аршанскага інструментальнага завода. 13 жніўня дыктатар адправіўся праінспектаваць працу прадпрыемства.

У прэс-службе дыктатара адзначаюць: тое, што пастаўленыя задачы не выконваюцца належным чынам, Лукашэнка ўбачыў, яшчэ толькі пад'язджаючы да завода. Ён звярнуў увагу, што нават спробы навесці парадак на тэрыторыі не прынеслі належнага выніку. Усё нібыта было зроблена спехам і няякасна.

«Не любіце вы людзей, не любіце вы завод. Калі ўжо робіце тут нейкую паказуху, зрабіце бардзюр, але навошта ў траву класці асфальт. Гэта што, культура? Вось за гэта чыноўнікаў і ненавідзіць часам народ - за вашы бязладнасць і бязладдзе», - сказаў дыктатар.

У гэтым жа ключы размова ішла і пасля наведвання прадпрыемства. Лукашэнка застаўся вельмі незадаволены ўбачаным.

«Хутчэй за ўсё, міністра (міністра прамысловасці Віталя Воўка) сюды накіруем да цябе працаваць. У яго выбар адзін: ці турма, ці сюды, - публічна пра гэта кажу. Пакуль двойка з мінусам і да цябе прэтэнзій мора. Ніколі не займайся ашуканствам. Ты - малады кіраўнік. Ты тут галоўны. Не дай бог, я перад Новым годам прыеду і маё вока ўчэпіцца дзесьці за нешта. Ты ведаеш, што будзе», - папярэдзіў Лукашэнка ў размове з дырэктарам завода Уладзіславам Бардзюковым.