На вайсковую базу РФ у Сірыі арганізавалі налёт
2- 13.08.2018, 14:32
- 23,676
Ён стаў чацвёртым за тыдзень.
У Сірыі чацвёртым разам за тыдзень здзейснілі налёт на расейскую авіябазу Хмеймім.
Пра гэта паведаміў начальнік расейскага цэнтра ў Сірыі генерал-маёр Аляксей Цыганкоў, паведамляе Interfax.ru.
З ягоных слоў, сродкі кантролю расейцаў выявілі два беспілотнікі, запушчаныя ў кірунку авіябазы з правінцыі Ідліб. Як вядома, БПЛА, акрамя выведвальных функцый, могуць скідаць і бомбы.
Вайскоўцы РФ сцвярджаюць, што знішчылі аб'екты. Акрамя таго, са слоў Цыганкова, так цягам 12 жніўня быў зафіксаваны шэраг абстрэлаў пазіцый урадавых войскаў. У той жа час урадавыя сілы нанеслі авіяўдар у Ідлібе, забіўшы 40 чалавек, у тым ліку 20 дзяцей.
Цяпер блізу 60% правінцыі Ідліб кантралюецца кааліцыяй антыўрадавых груповак Хаят Тагрыр Аш-Шам. Цягам мінулага месяца прэзідэнт Сірыі Башар Асад пакляўся вярнуць сабе тэрыторыю пасля таго, як сірыйскае і расейскае войскі дамагліся поспехаў у іншых частках краіны, заявіўшы: «Ідліб - гэта наша мэта».
Ідліб з'яўляецца апошнім буйным раёнам, які ўтрымліваецца паўстанцамі, і, як чакаецца, стане наступнай мэтай сірыйскіх узброеных сіл.
Расея, Іран і Турцыя на пасяджэнні сірыйскай гуманітарнай групы паабяцалі зрабіць усё магчымае, каб пазбегнуць бітвы, якая пагражала б мільёнам грамадзянскіх асоб ва ўтрымоўваным паўстанцамі Ідлібе.