Сур'ёзная аварыя: пад Іўем сутыкнуліся лоб у лоб дзве маршруткі

Удар быў такой сілы, што вырваліся сядзенні з пасажырамі.

12 жніўня прыблізна а 20.00 на трасе М6 «Мінск - Гародня» паблізу павароту на Іўе адбылася цяжкая аварыя: лоб у лоб сутыкнуліся два мікрааўтобусы, адзін з якіх быў маршруткай.

Паводле папярэдняй інфармацыі, за стырном VW T5 знаходзіўся п'яны кіроўца, ён перасёк лінію разметкі і ехаў насустрач маршрутцы VW Crafter. Autogrodno.by публікуе фатаграфіі з месца здарэння дэталі таго, што адбылося.

Аднаму з відавочцаў наступстваў ДТЗ удалося пагутарыць з кіроўцам маршруткі, на якой пасажыры ехалі ў Польшчу. Той растлумачыў, што яму насустрач выехаў VW T5 і, каб пазбегнуць сутыкнення, кіроўца маршруткі таксама выехаў на сустрэчную паласу, каб размінуцца з аўтамабілем. Аднак, у самы апошні момант VW T5 вярнуўся ў сваю паласу і мікрааўтобусы сутыкнуліся лоб у лоб, з невялікім зрушэннем. Такім чынам на фота можа здацца, што на сустрэчную паласу выехаў VW Crafter.

Кіроўца маршруткі таксама дадаў, што яго хуткасць не была высокай, ён нядаўна ад'ехаў ад прыпыначнага пункта. Але VW T5 набліжаўся досыць хутка, не выключана, што з перавышэннем хуткасці, бо на тым адцінку хуткасць абмежаваная 70 км/г.

Удар быў такой сілы, што пасажыры VW Crafter сваімі целамі вырвалі сядзенні. Некаторыя пасажыры атрымалі вельмі сур'ёзныя траўмы.

- Хуткая дапамога прыехала хутка, - распавядае Віктар, які быў на месцы здарэння праз некалькі хвілін пасля ўдару. - Шмат каму з пасажыраў было вельмі цяжка. Напрыклад, адзін мужчына гучна крычаў, яму не дапамагалі абязбольвальныя. Наколькі я зразумеў, трох чалавек забралі з сур'ёзнымі траўмамі. На шчасце, усе людзі жывыя, а дзяцей у салоне не было.

У кіроўцы маршруткі была пашкоджаная нага, але па дапамогу да медыкаў ён не звяртаўся.

- Чаму ідзе гаворка пра п'янага кіроўцу, VW T5?

- Так мяркуюць даслоўна ўсе, хто быў на месцы здарэння. У салоне «Фольксвагена» стаяў моцны пах алкаголю. Гэта адзначалі ўсе, хто зазіраў у бус. Кіроўцу WV T5 павезлі на хуткай. Але відавочцам здалося, што ён нават не зразумеў што адбылося. Добра, што ў бусе ён быў адзін, без пасажыраў.

- Людзі з апошніх шэрагаў маршруткі практычна не пацярпелі. Адзін хлопец распавядаў, што перад адпраўленнем хацеў сядзець спераду, поруч з кіроўцам, але потым перадумаў і размясціўся на апошнім шэрагу, - дадаў мужчына.