Суд паводле «справы прафзвязаў»: суддзя ўзяла тайм-аўт
6- 13.08.2018, 10:34
- 13,636
Фото: spring96.org
(Обноўлeна) У Менску прайшоў адзінаццаты дзень суда над лідарамі прафзвязу РЭП.
Разгляд крымінальнай справы старшыні Беларускага незалежнага прафзвязу работнікаў радыёэлектроннай прамысловасці (РЭП) Генадзя Фядыніча і галоўнага бухгалтара прафзвязу РЭП Ігара Комліка доўжыцца 13 жніўня ў судзе Савецкага раёна Менска, паведамляе праваабарончы цэнтр «Вясна».
Ім выстаўленае абвінавачванне паводле ч 2 арт 243 Крымінальнага кодэксу Беларусі («ухіленне ад выплаты сум падаткаў, збораў у асабліва вялікай суме»). Працэс вядзе суддзя Марына Фёдарава.
Маніторынг судовага паседжання працягваюць весці праваабаронцы і назіральнікі ад прафзвязных арганізацый.
На судовым пасяджэнні ў панядзелак прысутнічае больш за 20 чалавек. Сярод іх - актывісты прафзвязу РЭП, грамадскія актывісты. Падтрымаць лідараў прафзвязу РЭП з Гомеля прыехаў старшыня АГП Васіль Палякоў.
Прысутнічаюць таксама праваабаронцы Алесь Бяляцкі і Зміцер Салаўёў.
Суд працягвае вывучэнне рэчыўных довадаў: дыскі, флэшкі, на якіх змяшчаецца розная інфармацыя пра ўнёскі, арэнду і г.д.
Знайшлі прыходы грашовых сродкаў ад Фядыніча і Комлік на сумы больш за 1 млн рублёў за 2011 год (гэта зусім мізэрная на той час сума).
Пракурор Вадзім Казей пералічвае чэкі.
Абаронца задае пытанні Фядынічу:
- Прыход ад вас у касу РЭП?
- Унёскі збіраліся амаль ўручную. Я быў упаўнаважаным раз на месяц адпаведна чэку ў «Белінвестбанку» здымаць грошы на заробкі.
Абаронца папрасіла пракаментаваць «сяброўскія ўнёскі».
- Частка грошай здымалася і паводле ведамасцяў выплачваліся ганарары штатным работнікам. Гэта ўсё адлюстроўвалася ў бухгалтарскай праграме 1С. Гэтым займалася бухгалтэрыя.
Нечакана суддзя Фёдарава абвясціла перапынак да 10 гадзін раніцы 15 жніўня.
