Лаві момант: як сфатаграфаваць будучы зарапад 11–13 жніўня

У найбліжэйшы ўік-энд Зямля пройдзе праз метэорную плынь Персеіды.

NASA апублікавала парады для фатаграфіі гэтай касмічнай з'явы, піша «Новы час».

Лета – час кароткіх, але надзвычай прыгожых начэй. Месяцовыя зацьменні (з чым як ніколі пашанцавала сёлета), зарніцы і, вядома ж, традыцыя з жаданнямі пад палёт знічак.

Хоць цяпер тонкія душы рамантыкаў могуць разбіцца аб рэаліі халоднага космасу. На самай справе ніякія зоркі нікуды не падаюць, і гэты выраз у сваёй сутнасці – абсурдны, але да гэтага часу шырока ўжываецца для абазначэння гарэння метэораў.

Чарговы зарапад чакаецца ўжо праз некалькі дзён, і ахвотныя атрымаць прыгожыя кадры начнога неба будуць выкарыстоўваць усе магчымыя прыёмы фатаграфіі – ад доўгай вытрымкі да постпрадакшн размалёўкі космасу ў фіялетавыя колеры.

Эксперты з NASA прадугледзелі цікавасць да гэтай падзеі і апублікавалі асноўныя парады для фатаграфавання метэорнай плыні Персеіды 11–13 жніўня.

Відавочна, спецыялісты з нацыянальнай касмічнай управы ЗША прапануюць у гэтыя дні з'ехаць як мага далей ад гарадскіх агнёў і знайсці месца з найбольш цёмным і чыстым небам. Наўрад ці вашы вочы змогуць улавіць нават самыя яркія начныя мігценні ў добра асветленым цэнтры горада.

Што тычыцца тэхнічнага складніку – тут таксама ўсё проста: для рэзкага якаснага здымка раяць выкарыстоўваць штатыў, максімальна доўгую вытрымку і таймер або дыстанцыйнае кіраванне засаўкай камеры. Найменшы рух рукі пры націску кнопкі можа сапсаваць усю праведзеную працу.

Пры магчымасці лепш выкарыстоўваць найбольш шырокафарматны аб'ектыў або рыбіна вока, каб захапіць як мага больш прасторы.

Нават калі вы аматар – найлепш перавесці фотаапарат у рэжым ручной факусоўкі. Аўтафокус уночы не зразумее на якім менавіта месцы трэба акцэнтаваць увагу.

Яшчэ пажадана загадзя накіраваць аб'ектыў у патрэбны бок. Украінцам пашанцавала, бо зарапад лепш за ўсё будзе відаць у Паўночным паўшар'і і да сярэдзіны паўднёвых шыротаў з боку сузор'я Персея (карта зорнага неба ў дапамогу).

Напрыканцы NASA банальна раіць касмічным натуралістам эксперыментаваць. Больш за ўсё залежыць ад хуткасці засаўкі – на максімальных значэннях вы можаце сфатаграфаваць не толькі метэоры, але і палосы ад перамяшчэння зорак. Калі ж хочаце, каб мільёны маленькіх кропак заставаліся статычнымі – лепш не перабіраць з shutter speed.

Біл Кукі, спецыяліст NASA ў метэорах, кажа, што сёлета можна будзе ўбачыць няшмат, максімум ад 60 да 70 метэораў за гадзіну. Да параўнання, у мінулыя гады гэтая колькасць дасягала 200.

«Людзі назіраюць за гэтай метэорнай плынню часцей за ўсё, таму што яна адбываецца летам, калі ночы цёплыя і зручныя, і вам трэба турбавацца толькі пра камароў», – пракаментаваў Кукі для Space.com. «Месяц вельмі спрыяльны для метэораў Персеідаў сёлета, што можа зрабіць гэтую плынь адной з найлепшых у 2018-м».

Нагадаем, метэорная плынь Персеіды назіраецца штогод бліжэй да канца лета, калі Зямля праходзіць праз шлейф каметы Свіфта-Тутля. Часціцы, пакінутыя каметай, згараюць у нашай атмасферы і пакідаюць непаўторны светлавы эфект.