Беларусы ўсё часцей байкатуюць тэхагляд

Механізм спагнання дзяржмыты так і не стаў для людзей прымальным.

Дарожны збор, або дзяржаўную мыту за выдачу дазволу на допуск транспартнага сродку да ўдзелу ў дарожным руху, пачалі спаганяць з 2014 года. Памер платы варыюецца ад 2 да 25 базавых велічыняў у залежнасці ад тыпу транспартнага сродку і яго дазволенай максімальнай масы (цяпер 1 БВ складае Br24,5), піша «Віцебскі кур'ер».

Кошт правядзення тэхагляду на дыягнастычных станцыях складае ад Br9 да Br40 у залежнасці ад тыпу транспартнага сродку. Дазвол на допуск да ўдзелу ў дарожным руху выдаецца толькі пасля выплаты дзяржмыты, піша БелТА.

Механізм спагнання дзяржмыты так і не стаў успрымацца грамадствам як прымальны. Захоўваецца яго непрыманне аўтаўладальнікамі. Мы бачым гэта з колькасці транспартных сродкаў, якія прадстаўляюцца для праходжання тэхагляду. Іх становіцца ўсё менш. Таму мы падтрымліваем прапанову пра адвязку выплаты дарожнага збору ад працэдуры праходжання тэхагляду, – адзначыў кіраўнік вытворча-тэхнічнага аддзела прадпрыемства Міхаіл Міхалоўскі. Ён падкрэсліў, што чым больш аўтамабіляў будуць праходзіць дзяржтэхагляд, тым менш будзе адбывацца здарэнняў, звязаных з іх нездавальняльным тэхнічным станам.

Калі ў 2013 годзе «Белтэхагляд» выдаў амаль 1,870 млн дазволаў на допуск да ўдзелу ў дарожным руху, то ў 2017-м – 1,382 млн. У студзені-ліпені 2018 года было выдадзена 725 тыс. дазволаў, што на 8% менш, чым за аналагічны перыяд летась.

Як паведамляла раней намесніца міністра ў падатках і зборах Эла Сяліцкая, вядзецца праца над змяненнем парадку выплаты дзяржмыты за выдачу дазволу на допуск транспартнага сродку да ўдзелу ў дарожным руху. У тым ліку разглядаецца выплата яе памесячна або паквартальна на выбар плацельшчыка, а за больш доўгі перыяд – з ужываннем паніжальнага каэфіцыенту.

Прапануецца адвязаць выплату гэтага плацяжу ад праходжання тэхагляду, а кантроль за яго выплатай ажыццяўляць з дапамогай спецыяльных тэхнічных сродкаў, якія працуюць у аўтаматычным рэжыме. Распрацоўнікам адпаведнага дакумента з'яўляецца Міністэрства фінансаў.