Дыдзье Дэшам: Я што, павінен гаварыць пра нацыянальную каманду Расеі перад паўфіналам?

Галоўны трэнер нацыянальнай каманды Францыі жорстка адрэагаваў на пытанне расейскага журналіста не па тэме.

Галоўны трэнер каманды Францыі Дыдзье Дэшам рэзка адрэагаваў на пытанне журналіста пра каманду Расеі, яе моцныя і слабыя бакі, зададзеныя на прэс-канферэнцыі напярэдадні матчу 1/2 фіналу чэмпіянату свету 2018 з Бэльгіяй.

«Перакладчык, вы ўпэўненыя, што пытанне было пра каманду Расеі? Я што, рэальна павінен гаварыць пра гэту каманду? Ну добра, проста я не разумею, чаму мяне просяць гаварыць пра каманду Расеі напярэдадні паўфіналу чэмпіянату свету супраць іншай каманды. Не бачу логікі. Тут ёсць журналісты з Францыі, Бэльгіі, іншых краін. Давайце рухацца далей», - цытуе Дэшама championat.com.

Матч Францыя - Бэльгія адбудзецца 10 ліпеня ў Санкт-Пецярбургу і пачнецца а 21:00 паводле беларускага часу.