Леў Марголін: «Струна» ў эканоміцы можа лопнуць

Улады пайшлі па слізкай дарожцы.

Улады заяўляюць, што ў Беларусі ў другім паўгоддзі нібыта «падвысяць заробкі» работнікам бюджэтных арганізацый. Гэта паабяцала Міністэрства фінансаў, але называць канкрэтныя сумы чыноўнікі не сталі, піша «Заўтра тваёй краіны».

Эканаміст Леў Марголін звяртае ўвагу, што ў параўнанні з мінулым годам сярэдні заробак у краіне вырас на 13%, а ў бюджэтнікаў, магчыма, не, таму ўлады і хочуць падцягнуць яго ў бюджэтнай сферы да агульнага назоўніка.

- Фактычна, сёння падвышэнне заробкаў наогул не абгрунтаванае, бо прадукцыйнасць працы не расце, аб'ёмы вытворчасці растуць значна меншымі тэмпамі, чым заробак. Так што гэта слізкая дарожка, струна, якую нацягваюць і якая ў пэўны момант можа парвацца, - мяркуе эканаміст Леў Марголін.

На ягоную думку, паняцце сярэдняга заробку ў Беларусі з'яўляецца не столькі эканамічным, колькі палітычным.

- Гэта вялікая палітыка, паколькі ўжо 10 гадоў прайшло, як Лукашэнка прапанаваў лозунг «па пяцьсот» (даляраў), але дагэтуль мы не можам гэтага дамагчыся, - кажа суразмоўца.

Сама па сабе ідэя дасягнуць сярэдняга заробку на тысячу рублёў не з'яўляецца рацыянальнай, працягвае ён.

- Калі б у нас была рынкавая эканоміка, калі б дзяржава толькі ўстанаўлівала правілы гульні і сачыла за іх выкананнем, то наогул ні ў каго галава не балела б наконт гэтага пытання. Я не чуў, каб хтосьці абмяркоўваў сярэдні заробак у Нямеччыне ці нават у Польшчы альбо Літве, - адзначае эканаміст.

Што да планкі сярэдняга заробку на тысячу рублёў, то пакуль яна не дасягальная, мяркуе ён.

- На практыцы мы ўжо не раз сутыкаліся з дасягненнем патрэбных паказчыкаў сярэдняга заробку, што прыводзіла да інфляцыі і дэвальвацыі беларускага рубля, пасля чаго ўсё вярталася на кругі свае. А для таго, каб эканоміка пачала сапраўды прыбаўляць, патрэбныя інвестыцыі, прычым не такія, калі дзяржава дае грошы прадпрыемству ў выглядзе крэдытаў або купляе іх акцыі, а рэальныя інвестыцыі для павелічэння аб'ёму вытворчасці тавараў і паслуг, якія карыстаюцца попытам. Пакуль у нас такіх інвестыцый не відаць і не прадбачыцца, казаць аб рэальным, а не вымучаным, росце прадукцыйнасці працы і, адпаведна, заробку не даводзіцца, - рэзюмуе Леў Марголін.