Інцыдэнт у Слуцку: Кандуктарка ўспала на дзіця праз «несапраўднае пасведчанне»

Маці дзіцяці надумала дамагчыся справядлівасці.

Вячэрняя паездка на аўтобусе была канфліктнай для 14-гадовага жыхара Слуцку і кандуктаркі. Супрацоўніца аўтапарка не хацела прызнаваць сапраўдным пасведчанне інваліда, якое ёй паказаў падлетак. Мама хлопчыка абураная і збіраецца напісаць скаргу ў Слуцкі аўтапарк, паведамляе «Курьер».

Пра падрабязнасці інцыдэнту распавяла Вікторыя Карповіч, мама 14-гадовага Максіма.

Увечары ў сераду, 4 ліпеня, Вікторыя папрасіла сына адвезці на лецішча ў Наводворцы непатрэбныя рэчы. А 19.23 ён сеў у аўтобус №2 на прыпынку «Майскі Пасад», побач з якім у сацыяльным доме жыве сям'я Карповіч.

Прыкладна праз 15 хвілін Вікторыі патэлефанаваў Максім і сказаў, што кандуктар уважае ягонае пасведчанне за несапраўднае - яно павінна быць пластыкавым, а не папяровым. Пасля падлетак перадаў слухаўку кандуктару, і з ёй ужо размаўляла мама.

«Яна сказала мне, што мы падрабілі пасведчанне, бо яно папяровае і напісана рознымі асадкамі. Я ёй патлумачыла, што пасведчанне выдаецца на пяць гадоў, а потым падаўжаецца яго тэрмін дзеяння. Таму адным чарнілам і асадкай гэта рабіць немагчыма. Ужо гадоў дзесяць мы і мае знаёмыя з дзецьмі-інвалідамі атрымліваем дакумент у такім выглядзе», - распавядае Вікторыя.

Праз тэлефон Максім сказаў маме, што кандуктар забараніла яму садзіцца ў аўтобус са сваім пасведчаннем. Вікторыя адказала сыну, каб ён не ішоў дадому з Наводворцаў пешшу - гэта прыкладна 4 км і блізу гадзіны хады.

Як распавядае случанка, у аўтобусе сын зноў ёй набраў і паведаміў, што кандуктар зноў на яго крычыць і даводзіць, што пасведчанне несапраўднае. Вікторыя сказала, каб ён ехаў дадому, а яна потым разбярэцца ў гэтай канфліктнай сітуацыі.

Маці Максіма пайшла на прыпынак, каб дачакацца аўтобуса №2 і пагаварыць з кандуктарам.

«Я папрасіла кіроўцу даць нам з кандуктарам хвілінку, каб пагаварыць. Размова праходзіла на падвышаных тонах. Астатнія пасажыры ў гутарку не ўступалі. Кандуктарка рэзка перайшла на «ты». Я зрабіла ёй заўвагу, каб яна мне не тыкала. Сказала, што, калі не верыць у сапраўднасць дакумента, хай звяртаецца ў МРЭК. На што кандуктарка адказала, маўляў, вам трэба - вы і ідзіце. Я папярэдзіла, што не спушчу ёй гэта з рук і напішу на яе скаргу. Яна адказала: «Пішыце, што хочаце», - успамінае ўчорашні вечар Вікторыя.

Пасля размовы з кандуктаркай мама Максіма патэлефанавала на «гарачую лінію» Слуцкага райвыканкама, дзе ёй паабяцалі разабрацца ў сітуацыі. У чацвер, 5 ліпеня, яна плануе з'ездзіць у Слуцкі аўтапарк і пагаварыць з начальствам наконт паводзін супрацоўніцы.

«Дзіця ў мяне гарачае. Можа, ён ёй і крычаў у адказ, гаварыў груба. Са слоў сына, яна абзывала яго хворым і недаразвітым. Я мяркую, што кандуктар не мела права абражаць і зневажаць пасажыра. Яна павінна была звярнуць увагу на пасведчанне, якое ўжо кажа пра тое, што з дзіцем не ўсё ў парадку», - кажа Вікторыя.

Максім знаходзіцца на хатнім навучанні. У гэтым годзе ён скончыў 7-ы клас пры СШ №12.

«Я адчуваў злосць. Кандуктарка паводзіла сябе неадэкватна. Я прасіў яе супакоіцца, згаджаўся з ёй, але яна не рэагавала і працягвала мяне чапляць словамі», - кажа Максім.

Галіна Саньковіч, кандуктарка аўтобуса № 2, не захацела распавядаць сваю версію таго, што адбылося.

«Я вам адно скажу, як яна (Вікторыя Карповіч - Заўвага рэд.) магла напісаць праўду, калі яе там не было. Вы ведаеце, у нас такі народ, у якога кандуктары ўсё адно ва ўсім вінаватыя. Я не кажу, што кандуктары ў нас анёлы, але ў кожнага свая сітуацыя і гісторыя. З мяне зрабілі нейкага монстра».

У аўтобусным парку ў Вікторыі Карповіч папрасілі прабачэння. Яе папрасілі не звяртацца з гэтай гісторыяй у СМІ, але жанчына сказала, што ўжо позна.

«Супрацоўнікі аўтапарка здзіўленыя паводзінамі сваёй кандуктаркі. Паабяцалі пакараць яе (накшталт прэміі пазбавіць) і пазней паведаміць мне пра гэта», - кажа Вікторыя.

Для даведкі. У пасведчанні інваліднасці ёсць наступная інфармацыя: Прозвішча, імя, дата нараджэння, подпіс і фота ўладальніка, назва медыка-рэабілітацыйнай арганізацыі, якая яго выдала (Медыка-рэабілітацыйная экспертная камісія Слуцкага раёна), дата выдачы, подпіс і пячатка старшыні МРЭК, група і прычына інваліднасці, тэрмін падаўжэння. Колер пасведчання - аранжавы.