Беларускі хор вызначыўся на аўтарытэтным конкурсе ў Гішпаніі
1- 30.07.2018, 11:49
- 13,316
Ён узяў тры ўзнагароды на адным з найстарэйшых і аўтарытэтных конкурсаў харавога спеву.
Беларуская дзявочая харавая капэла «Ранiца» ўзяла тры ўзнагароды на 64-м міжнародным конкурсе хабанераў і поліфаніі ў гішпанскім горадзе Торэв’еха.
Пра гэта паведамляе газета Información (пераклад – belmir.by).
У цяперашніх спаборніцтвах удзельнічалі 12 хароў з 11 краінаў – Гішпаніі, Украіны, Кітая, Сербіі, Румыніі, Беларусі, Мексікі, Калумбіі, Інданезіі, Македоніі і Філіпінаў. Яны былі адабраныя з больш чым сотні заявак.
Беларусы занялі другія месцы ў абедзвюх катэгорыях – хабанерах і поліфаніі, атрымаўшы грашовыя прызы 5 тысячаў еўраў і 4 тысячы еўраў адпаведна.
Акрамя таго, настаўнік «Ранiцы» Віктар Масленікаў быў прызнаны на конкурсе найлепшым кіраўніком хору.
Першае ж месца ў дзвюх катэгорыях занялі прадстаўнікі Філіпінаў. Іх прэміі склалі 12 тысячаў еўраў і 10 тысячаў еўраў. Яны ж узялі прыз глядацкіх сімпатый – плюс 2 тысячы еўраў.
Міжнародны конкурс хабанераў і поліфаніі ў Торэв’есе пачалі праводзіць з 1955 года. Ён з'яўляецца адным з найстарэйшых і аўтарытэтных конкурсаў харавога спеву.