У Беларусі збіраюцца перагледзець разлік бальнічных

Прапануецца не аплачваць бальнічныя работнікам у сувязі з агульным захворваннем або траўмай у побыце.

У Беларусі для зніжэння выдаткаў ФСАН разглядаецца магчымасць змены падыходаў да аплаты бальнічных, піша tut.by.

Напрыклад, прапануецца не аплачваць бальнічныя работнікам у сувязі з агульным захворваннем або траўмай у побыце першыя тры каляндарныя дні, а аплачваць іх толькі з чацвёртага дня часовай непрацаздольнасці.

Такая прапанова была агучаная на адным з апошніх пасяджэнняў савета рэспублікі, на якім абмяркоўвалі праблему зніжэння выдаткаў ФСАН.

Раней улады ўжо выказвалі занепакоенасць тым, што выдаткі на выплату грошай у бальнічным прыкметна выраслі. Колькі сродкаў сыходзіць на выплаты праз часовую непрацаздольнасць?

У Мінпрацы ў пачатку гэтага года заяўлялі, што ў краіне растуць выдаткі на дапамогі праз часовую непрацаздольнасць. Гэтую праблему маюць намер развязваць супольна з Міністэрствам аховы здароўя.

- Выклікае заклапочанасць рост выдаткаў на выплату дапамог праз часовую непрацаздольнасць. Значны прырост назіраецца ў Менскай, Берасцейскай і Гомельскай абласцях. Мяркую, што супольна з органамі аховы здароўя неабходна правесці сур'ёзны аналіз прычын росту паказчыкаў часовай непрацаздольнасці з распрацоўкай адпаведных захадаў, - адзначала міністр працы і сацыяльнай абароны Ірына Касцевіч.

З ФСАН на выплату ўсіх тыпаў дзяржаўных дапамог летась накіравалі 21,2% выдаткаў - прыкладна Br2,6 млрд, паведаміла раней кіраўніца фонду сацыяльнай абароны насельніцтва Наталля Паўлючэнка. Больш за ўсё сышло грошай на дапамогі ў доглядзе дзіцяці ва ўзросце да 3 гадоў (44% ад усіх выдаткаў на выплату дапамог). Толькі за 2017 год іх было прызначана на суму Br1145,5 млн.

Наступныя паводле велічыні выдаткі - на аплату дапамог праз часовую непрацаздольнасць (21,6% ад усіх выдаткаў на выплату дапамог).

Расходы на аплату бальнічных за мінулы год склалі 561 мільён рублёў, паведаміла на адным з апошніх пасяджэнняў у парламенце Ірына Касцевіч. З яе слоў, усяго за 2017 год было выплачана больш за 3 мільёны дапамог.

Цяпер дапамога часова непрацаздольным, паводле агульнага правіла, прызначаецца ў суме 80% сярэднядзённага заробку за першыя 12 каляндарных дзён непрацаздольнасці і ў суме 100% сярэднядзённага заробку за наступныя каляндарныя дні бесперапыннай часовай непрацаздольнасці.

Гэта дапамога часткова замяшчае заробак застрахаванаму работніку з прычыны яго часовай страты паводле медыцынскіх і (або) сацыяльных прычын (агульнае захворванне, траўма ў побыце і іншае). Гэта значыць, улічваюцца як траўмы ў побыце, так і агульныя захворванні.

Дапамога часова непрацаздольным прызначаецца пры ўмове выплаты за застрахаваную асобу, а таксама ёй самой у прадугледжаных заканадаўствам выпадках абавязковых страхавых унёскаў на сацыяльнае страхаванне. Тарыф абавязковых страхавых унёскаў на сацыяльнае страхаванне, у тым ліку на выпадак часовай непрацаздольнасці, складае 6%. У сувязі з гэтым пры захаванні названай умовы застрахаванай асобе неабходна гарантаваць дапамогу ва ўстаноўленай суме, незалежна ад таго, у стацыянарных або ў амбулаторных умовах праходзіла лячэнне.

- Сума дапамогі часова непрацаздольным як выплата сацыяльнага характару не можа цалкам кампенсаваць заробак работніка, згублены ў сувязі з вызваленнем ад працы. У адваротным выпадку з'яўляецца зацікаўленасць хварэць, - тлумачылі раней у Мінпрацы. - З улікам выкладзенага, сума дапамогі ўстанаўлівалася з улікам таго, каб не было зацікаўленасці хварэць і ў той жа час забяспечыць застрахаванай асобе сацыяльную абарону ў выпадку наступлення ў яе часовай непрацаздольнасці.