Былыя міністры юстыцыі трох краін заклікаюць Amnesty International прызнаць Аляксея Пічугіна вязнем сумлення

Арыштаваны ў 2003 годзе Пічугін - палітвязень, які адбывае самы працяглы турэмны тэрмін у РФ.

"Мы звяртаемся да Amnesty International з просьбай прызнаць Аляксея Пічугіна палітычным зняволеным і вязнем сумлення", - пішуць былы міністр юстыцыі Канады Ірвін Котлер, былы міністр юстыцыі Ізраіля Давід Лібаі і былая міністарка юстыцыі Нямеччыны Герта Дойблер-Гмелін у лісце, які публікуе 25 ліпеня друкаваная версія газеты The Guardian (пераклад - inopressa.ru).

"Аляксей Пічугін, арыштаваны ў 2003 годзе, - палітычны зняволены, які адбывае самы працяглы турэмны тэрмін у Расеі. Сёння яму спаўняецца 56 гадоў", - зазначаюць яны.

"Пічугін быў арыштаваны 19 чэрвеня 2003 года, што стала першым ударам у кампаніі расейскага прэзідэнта Пуціна, накіраванай на незаконную экспрапрыяцыю нафтавай кампаніі ЮКОС. З тых часоў Пічугін знаходзіцца ў зняволенні ў РФ, стаўшы палітычным зняволеным, якi адбывае самы доўгі тэрмін у пуцінскай Расеі, - нагадваюць аўтары публікацыі. - Пічугін - закладнік, якога Пуцін выкарыстоўвае ў імкненні знайсці вагары ціску на шэраг уплывовых асоб. Сярод іх - Міхаіл Хадаркоўскі, якому Вялікабрытанія дала палітычны прытулак на падставе абвінавачванняў, што часткова супадаюць з абвінавачваннямі, што выстаўляюцца Пічугіну. Самога Хадаркоўскага Amnesty International у мінулым прызнала вязнем сумлення".

"Пічугіна ўтрымліваюць у сумна вядомай турме "Чорны дэльфін". Яго неаднаразова прывозілі на аб'екты, кіраваныя ФСБ, спадкаемцай КДБ, дзе шпігавалі наркотыкамі і дапытвалі без прысутнасці ягоных адвакатаў. У кватэры састарэлай маці Пічугіна і ў кватэры ягонага брата расейскія камандас правялі рэйды. Ён перанёс паказальныя судовыя працэсы, заснаваныя на сфабрыкаваных довадах і сведчаннях сведак, якія пазней адмовіліся ад сваіх слоў, пацвердзіўшы, што выступілі супраць Пічугіна толькі з прычыны таго, што следчыя назвалі ім ягонае імя і сказалі, што казаць. Еўрапейскі суд правоў чалавека двойчы выносіў пастанову аб тым, што працэсы над Пічугіным былі несправядлівымі і парушалі стандарты міжнародных правоў чалавека", - зазначаюць былыя міністры.

"Amnesty International павінна дадаць свой голас да галасоў Freedom House, Цэнтру правоў чалавека Рауля Валенбэрга, Фонду правоў чалавека і справядлівасці Лантаса ды Цэнтру правоў чалавека "Мемарыял", - упэўненыя аўтары. - Усе гэтыя арганізацыі прызналі Пічугіна палітычным зняволеным. Пічугін такім і з'яўляецца, і працяг ягонага зняволення - гэта выццё сірэны, які сігналізуе аб парушэнні законнасці ў Расеі спадара Пуціна".