Польскі аўтапрам усё больш мае патрэбы ў супрацоўніках з-за мяжы
2- 25.07.2018, 14:56
- 16,129
Галіна дынамічна развіваецца.
Працоўныя мігранты з Украіны, якія пастанавілі прадоўжыць сваю кар'еру ў Польшчы, усё часцей выбіраюць польскую аўтамабільную прамысловасць. Пра гэта гаворыцца ў дакладзе Групы EWL, якая займаецца працаўладкаваннем іншаземцаў у Польшчы, паведамляе «Радыё Польшча».
У сваю чаргу польская аўтамабільная галіна, якая за апошнія гады дынамічна развіваецца, таксама зацікаўленая ў працаўладкаванні ўкраінцаў.
«Украіна – краіна з даўнімі традыцыямі ў галіне аўтамабілебудавання. Яшчэ 10 гадоў таму там выраблялася больш за 420 тыс. аўтамабіляў за год. Сёння ўкраінская аўтамабільная прамысловасць знаходзіцца ў глыбокім крызісе, а спецыялісты ў гэтай галіне страцілі магчымасць працаваць паводле сваёй спецыяльнасці», – гаворыцца ў дакладзе.
«Польскія аўтамабільныя фірмы шукаюць як недасведчаных супрацоўнікаў на вытворчыя вакансіі (аператараў вытворчасці, манцёраў, супрацоўнікаў аддзела кантролю якасці), так і высокакваліфікаваных спецыялістаў (кіраўнікоў зменаў, кіраўнікоў вытворчасці, тэхнікаў), а таксама інжынераў для цэнтраў навукова-даследчых і доследна-канструктарскіх працаў», – заявіў кіраўнік Групы EWL Анджэй Коркус.
Згодна з апублікаваным дакладам, нават недасведчаны супрацоўнік з Украіны ў польскай аўтамабілебудаўнічай фірме можа зарабіць ад 2,5 да 3,5 тыс. злотых (ад 600 да 800 еўраў) за месяц. У той самы час сярэдні заробак у Польшчы складае блізу 3,5 тыс. злотых.