У менскай 5-павярхоўцы падчас дажджу заліло кватэры на ўсіх паверхах

Людзі вінавацяць у тым, што здарылася мясцовае ЖЭУ.

Адзін з пад'ездаў дома №110 на праспекце Ракасоўскага пасля дажджу ператварыўся ў 5-павярховы аквапарк: заліло усё аж да падмурка дома, адбылося кароткае замыканне лічыльнікаў, жыхарам давялося выклікаць МНС, і наступныя 18 гадзін дом правёў без электрычнасці, піша tut.by.

Людзі вінавацяць у тым, што здарылася мясцовае ЖЭУ і тое, што яно з мінулага года не ліквідуе няспраўнасці ў сістэме водаадвода. ЖЭУ парыруе: лакальны рамонт даху праводзіўся, а капітальны пачнецца ў добрае надвор'е.

- Уся вада сцякала ў кватэры, пад'езд, іскрылі і дымілі шчыткі, людзі з верхніх паверхаў ратавалі свае затопленыя кватэры, астатнія вычэрпвалі ваду, - апісвае апакаліпсіс Наталля, жыхарка дома. - Прыехала МНС і абясточыла пад'езд, пры гэтым з прадстаўнікоў ЖЭСу не было нікога, толькі а 21:00 з'явіўся в. а. дырэктара.

Са слоў жыхароў, першая заяўка пра залітую кватэру паступіла яшчэ год таму, а з 18 траўня толькі дзве кватэры на Ракасоўскага залівала 11 разоў.

- Праз пастаянныя працёкі на сценах пад'езда з'явілася цвіль і грыбок, - кажа Наталля. - Бяздзейнасць ЖЭСа пацягнула затапленне ўсяго пад'езда, псаванне электраправодкі і маёмасці жыхароў. Капітальнага рамонту даху дагэтуль выраблена не было, сістэмы водаадвода працягваюць заставацца няспраўнымі, швы і трэшчыны ніхто не замураваў. Паводле прагнозаў сіноптыкаў, дажджы будуць ліць яшчэ не адзін дзень, а наперадзе восень. Што нас чакае далей - мы нават уявіць баімся.

ЖЭУ: «Рамонт даху пачнём у добрае надвор'е»

Сітуацыю пракаментаваў Яўген Забароўскі, галоўны інжынер ЖЭУ-2 Ленінскага раёна:

- Мы выявілі адну з прычын затаплення. Гэта разгерметызацыя варонкі ліўневай каналізацыі, якую знешне не відаць, бо яна знаходзіцца ў міжпаверхневых перакрыццях. Няспраўнасць ліквідавалі на наступны ж дзень для таго, каб мінімізаваць затапленне, якое можа паўтарыцца, калі сёння пойдзе дождж. Цяпер вядзём перамовы аб выбары падраднай арганізацыі для выканання рамонту ўсяго дахавага пакрыцця гэтага дома. З панядзелка пры спрыяльным надвор'і пачнём яго мяняць.

- А чаму рамонт не рабіўся на працягу мінулага года? Першая заяўка аб затапленні паступіла 25 ліпеня, гэта значыцца год назад.

- На той момант мы склалі акт, дзе былі выяўленыя дэфекты дахавага матэрыялу, і зрабілі лакальны рамонт. Ні адна заяўка без рамонтных прац не застаецца. Але ў гэты момант мы прынялі рашэнне, што больш не будзем рабіць лакальныя рамонты, а цалкам правядзём капітальны рамонт усяго дахавага пакрыцця.

- Пасля высыхання пашкоджаных месцаў, праз 15-21 дзень, будуць складзеныя дэфектныя акты па наступствах затаплення ў кватэрах і будуць складацца каштарысу на аплату шкоды. Згодна з гэтым каштарысам жыхары змогуць атрымаць кампенсацыю ў выглядзе грошай або рамонту, выкананага сіламі ЖЭСа, - сказаў на заканчэнне галоўны інжынер.