Футбольныя фанаты незадаволеныя: Навошта мы набываем квіткі і сезонныя абанементы?
6- 18.07.2018, 21:30
- 15,389
Квіткі на матч «Дынама» Менск – «Дэры Сіці» раздаюць бясплатна праз управу ідэалагічнай працы выканкама.
У чацвер, 19 ліпеня, на рэканструяваным стадыёне «Дынама» адбудзецца першы афіцыйны футбольны матч. У рамках першага кваліфікацыйнага раўнду Лігі Еўропы сустрэнуцца менскае «Дынама» і ірландскі «Дэры Сіці». Аднак запоўніць 20-тысячны стадыён футбольнымі фанатамі – задача не з простых. Таму ўлады ўключылі адміністрацыйны рэсурс. Перш у інтэрнэце з'явіўся факс, які рассылала Міністэрства спорту на прадпрыемствы, падначаленыя міністэрству.
– Беручы пад увагу высокую грамадска-палітычную значнасць гэтага мерапрыемства, просім забяспечыць прапанову заявак на квіткі для супрацоўнікаў арганізацыі (у адпаведнасці са штатнай колькасцю супрацоўнікаў арганізацыі колькасць квіткоў – ад 30 да 50 штук), – сказана ў дакуменце.
Але і гэта не дапамагло. У карыстанні kp.by апынуўся дакумент, які рассылае адміністрацыя Фрунзенскага раёна Менска на прадпрыемствы, зарэгістраваныя на тэрыторыі раёна:
– Адміністрацыя запрашае ваш працоўны калектыў на футбольны матч, – сказана ў дакуменце. – Квіткі прапануюцца бясплатна.
Для атрымання квіткоў трэба звяртацца ва ўправу ідэалагічнай працы выканкама.
Фанаты незадаволеныя:
– Навошта мы набываем квіткі на матчы і нават сезонныя абанементы, калі іх усё адно раздаюць бясплатна тым, каму яны зусім не патрэбныя? – абураюцца фанаты.
Абанемент на сезон з правам наведвання ўсіх хатніх матчаў «Дынама» да пачатку сезону каштаваў 50 рублёў. Квіткі на гэты матч каштуюць ад 4 да 6 рублёў. Цікава, што дзесяць цэнтральных сектараў для набыцця квіткоў заблакаваныя: відаць, на гэтыя сектары патрапяць «гледачы паводле разнарадкі».