Ягор Шаранговіч: НХЛ - гэта мара дзяцінства

Беларускі хакеіст распавёў аб падпісанні кантракту з «Нью-Джэрсі».

20-гадовы форвард Ягор Шаранговіч пракаментаваў падпісанне трохгадовага кантракту з «Нью-Джэрсі», піша афіцыйны сайт «Дынама».

- Як прайшоў кэмп пачаткоўцаў «Нью-Джэрсі»?

- На пазітыве. Было вельмі цікава. Нам заўсёды стваралі камандную атмасферу. Праводзілі мерапрыемствы, якія аб'ядноўвалі гульцоў. Раніцай трэніраваліся на лёдзе, затым займаліся «на зямлі», а ўвечары абавязкова тымбілдынг. У першы дзень паехалі на футбольную арэну на барбекю, у другі - наведалі бейсбольны матч, у трэці - пагулялі ў гольф, у чацвёрты - паганялі на картынгах... Увогуле, праграма была вельмі насычанай, таму час праляцеў незаўважна. Праўда, я зразумеў, што трэба падцягнуць ангельскую. Часам цяжкавата даваліся стасункі з партнёрамі. Цяпер гэта асноўная мэта на лета.

Трэніроўкі? Яшчэ за дзень да адкрыцця лагера правялі патрэбны занятак. Пазнаёміліся з трэнерскім штабам і кіраўніцтвам. Пасля пачатку кэмпа падзяліліся на групы і прыступілі да асноўных трэніровак. Дарэчы, было шмат практыкаванняў, якія выконваліся ў нацыянальнай камандзе Беларусі і ў «Дынама». І наогул сістэма вельмі падобная на тую, што прышчапляе Гордзі. Потым яшчэ быў турнір «тры на тры», а ў апошні дзень згулялі «дзвюхстаронку».

- Хтосьці з кіраўніцтва «Нью-Джэрсі» размаўляў з табой?

- Намеснік генеральнага мэнэджара. Пагаварылі ў канцы кэмпа, ён пацікавіўся далейшымі планамі. Я сказаў, што вельмі хачу застацца за акіянам і прабіцца ў НХЛ.

- Што адчуваў, калі падпісваў кантракт з «д'ябламі»?

- Вядома, НХЛ - гэта мара дзяцінства! Атрымліваецца, стаў на крок бліжэй да гэтай мары. Але цяпер трэба яшчэ больш працаваць, каб патрапіць у наймацнейшую лігу свету.

- Чаму наважыў перш за ўсё пасля падпісання кантракту адправіцца ў Раўбічы?

- Вельмі хацеў сказаць дзякуй трэнерскаму штабу «Дынама» за мінулы сезон. За той давер, які аказвалі. Часам у мяне не ўсё атрымлівалася, але настаўнікі прадаўжалі давяраць. Давалі досыць гульнявога часу для маладога хакеіста. Дзякуючы гэтаму і змог вырасці за мінулы год.