Ягор Герасімаў выйшаў у 1/8 фіналу тэніснага турніру ў Астане

Беларускі тэнісіст падолеў француза Давіда Гуэза.

Беларускі тэнісіст Ягор Герасімаў прабіўся ў 1/8 фіналу турніру ў казахстанскай Астане (прызавы фонд - $125 тысяч), паведамляе карэспандэнт БелТА.

У сваім стартавым паядынку Ягор Герасімаў падолеў француза Давіда Гуэза - 7:6 (8:6), 6:3.

У матчы за выхад у чвэрцьфінал адзіночнага разраду Ягор Герасімаў сустрэнецца з пераможцам матчу паміж бельгійцам Янік Мэртэнсам і Юрыем Радзівонавым з Аўстрыі.

Сёння яшчэ адзін беларус Дзмітрый Жырмонт у сустрэчы 1/16 фіналу з індыйскім тэнісістам Арджунам Кадхе саступіў першы сэт 2:6, а ў другім пры ліку 3:3 не змог працягнуць гульню праз праблемы са здароўем.

У 1/8 фіналу парнага разраду беларуска-расейскі тандэм Яраслаў Шыла/Міхаіл Елгін згуляе з інтэрнацыянальным дуэтам Себасцьян Офнер (Аўстрыя)/Алдзін Шэкціч (Боснія і Герцагавіна).

На жаночым турніры ў румынскім Бухарэсце (прызавы фонд - $250 тысяч) беларуска Лідзія Марозава і галандка Аранча Рус на старце парнага разраду будуць спаборнічаць з аргентынска-румынскім тандэмам Марыя Ірыгоен/Аляксандра Каданцу.