«Праз патоп кліентам давялося выходзіць на вуліцу праз акно»
5- 17.07.2018, 17:55
- 22,459
Учора работнікам устаноў у цэнтры Менска давялося з дапамогай тазікаў і ануч спраўляцца з наступствамі непагадзі.
«Адны вычэрпвалі ваду вёдрамі, іншыя робяць манікюр»
Менчукі прывыклі, што ліўнямі затапляла Нямігу. Але як толькі там з сітуацыяй удалося справіцца - вадой пачало заліваць нядаўна рэканструяваную пешаходную Рэвалюцыйную і ўчастак Камсамольскай, піша kp.by.
16 ліпеня работнікам устаноў, размешчаных на ёй, чарговым разам давялося з дапамогай вёдраў і ануч спраўляцца з наступствамі непагадзі.
- Блізу 7 вечара пачаўся моцны дождж, і пайшла вада ў памяшканне, пачало выбіваць люкі на вуліцы, - распавядае адміністратарка салона манікюру Наталля. - Мы пачалі зачыняць дзверы, выклікалі МНС. Яны адпампавалі ваду да ўзроўню 5 см вышэй падлогі, астатняе давялося прыбіраць самім. Выштурхоўвалі швабрамі ваду на вуліцу, чэрпалі яе вёдрамі і вылівалі ва ўнітаз! Але і працавалі... Было весела: адны супрацоўнікі выпампоўваюць ваду, іншыя - робяць манікюр. А кліентам і зусім давялося выходзіць з салона праз акно! Прыбралі ўсё да 11 вечара. Жартавалі, маўляў, трэба купальнікі надзець і зладзіць вечарыну. Хоць усё гэта сумна: вуліца прыгожая, але ж павінна быць і камфортнай.
За апошні тыдзень вуліцу затапляе ўжо другім разам.
- У пятніцу, 13 ліпеня мы перажылі магутны патоп. Праз арку да нас праходзіла вада, якая назбіралася на вуліцы падчас залевы, - распавядае супрацоўніца кавярні на Рэвалюцыйнай Мілана. - У нас было затоплена тэхнічнае памяшканне, пацярпелі дакументы, кампутары. Супрацоўнікі пачалі прыбіраць ваду, дапамагалі камунальныя службы. Узровень вады ў памяшканнях быў блізу 15 см, ухадзіліся прыкладна за 8 гадзін. Мы звярнуліся ў страхавую кампанію па кампенсацыю страт, гэта ж форс-мажор. Навучаныя пятнічным досведам, падрыхтаваліся і паставілі ў арцы ля ўваходу барыкады - кветачніцы і драўляныя лаўкі. Гэта і выратавала!
«За 11 гадоў нас затапляла толькі два разы, і абодва - пасля рэканструкцыі»
Іншым установам пашанцавала менш. Ад вады засталіся сляды на сценах, выбіла электрычнасць, патрэскалася плітка і плінтус.
- У нас затапіла склад, цяпер ім немагчыма карыстацца, там няма святла і жудасна волка, - кажа гаспадыня шоў-рума Ала. - МНС прыехала, калі ўсё было затоплена, а пра наш склад сказалі, што дапамагчы не могуць. Мы да ночы адтуль ваду прыбіралі! Там усё сцякае са сцен, прабітая столь... Будзем пісаць заяву на пакрыццё шкоды і ліквідацыю недахопаў. Жахліва, што такая сітуацыя паўторыцца пры першым жа ліўні!
У адзін голас работнікі ўстаноў кажуць, што да рэканструкцыі такога апакаліпсісу тут не было. Максімум, пасля дажджу заставаліся лужыны.
- Мы арандуем тут памяшканне 11 гадоў, затапляла толькі два разы, і абодва - пасля рэканструкцыі, - кажа гаспадыня крамы сумак Алёна. - Я не архітэктар, але бачу, што тут няма куды вадзе дзявацца, толькі ў маю краму! Мы тут прыбіралі ваду анучамі і вёдрамі да 10 вечара. Я сапсавала свае новыя басаножкі!
«Галоўная загвоздка - у ліўнёўках»
Вуліцу затапіла, 16 ліпеня, але яшчэ і 17-га на ўсю моц вяліся работы па аднаўленню, працоўныя расчышчалі дарогі ад пяску, намытага вадой. Да ўваходаў у памяшканні падносілі дзясяткі мяхоў з пяском на выпадак наступнага патопу, яны дапамогуць трохі затрымаць ваду.
- Гэта робіцца, каб менш вады патрапіла ўнутр будынка. Што вы хочаце, 21 стагоддзе - сучасныя тэхналогіі, - іранізуюць рабочыя, падносячы чарговы мяшок. - Тут галоўная загвоздка - у ліўнёўках, вада не паспявае сыходзіць і забіваецца. Не прадуманы момант з адводам вады, вось і наступствы! Старая вуліца была лепшая, таму што тут былі борцікі, і пешаходная частка была трохі вышэйшая за праезную. А цяпер усё выраўнялі - бачыце самі, што з гэтага атрымалася.
- Крыўдна за будынак. Так, цяпер нас хочуць засцерагчы, прывезлі мяшкі з пяском... Але сам будынак мае архітэктурную каштоўнасць, і яго ад такіх моцных ліўняў па-ранейшаму будзе падмываць! Чаму не хочуць яго засцерагчы гэты будынак? Ён жа ў выніку прыйдзе ў непрыдатнасць! - разважае Дар'я з крамы торбаў. - А падчас дажджу да нас кліенты патрапіць не змогуць, таму што вады па пояс! За што мы будзем арэнду плаціць?
17 ліпеня дажджоў пакуль не было, але, паводле прагнозаў, дні наперадзе павінны быць дажджлівымі. Што плануюць рабіць улады або арганізатары рэканструкцыі вуліцы, прадпрыемства «Менская спадчына», пакуль невядома.