Як правільна перавозіць праз мяжу грошы, тытунь і алкаголь

Некалькі парадаў, каб не патрапіць у непрыемную сітуацыю на мяжы.

У перыяд адпачынкаў узрастае частата перасячэння мяжы фізічнымі асобамі з таварамі для асабістага карыстання, у тым ліку з наяўнымі грашовымі сродкамі. Як не трапіць у непрыемную сітуацыю на мяжы? Для «Віцебскага кур'ера» тлумачыць Віцебская мытня:

- Звярнуць увагу на мытныя правілы трэба яшчэ пры выездзе з краіны. Так, калі вы плануеце ўзяць з сабой наяўныя грашовыя сродкі ў эквіваленце больш за 10 тысяч даляраў, іх неабходна задэклараваць у пункце пропуску ў пасажырскай мытнай дэкларацыі. Улічваюцца наяўныя сродкі ў любой валюце з разліку на аднаго чалавека. Грашовыя сродкі на банкаўскіх рахунках не ўлічваюцца.

Таксама нагадваем, што пры перасячэнні мяжы часцей, чым раз у тры месяцы, можна ўвозіць тавараў для асабістага карыстання на суму не больш за 300 еўра або вагой не больш за 20 кг. Пры перасячэнні мяжы з інтэрвалам большым, чым тры месяцы, гэтыя ліміты павялічваюцца да 1500 еўраў і 50 кг адпаведна.

Дапускаецца бязмытны ўвоз да 3 л алкагольных напояў (піва) і да 200 цыгарэт (цыгар, 200 гр тытуню) на аднаго паўналетняга чалавека.

Пры падарожжы самалётам ліміты бязмытнага ўвозу тавараў незалежна ад частаты перасячэння мяжы знаходзяцца ў межах па кошце да 10 тысяч еўра і па вазе да 50 кг.

Больш падрабязна з нормамі перамяшчэння тавараў для асабістага карыстання можна азнаёміцца на Адзіным інтэрнэт-партале мытных органаў customs.gov.by.