Халодны душ для беларускай эканомікі
12- 17.07.2018, 15:04
- 24,113
Чаму МВФ не дае грошай Лукашэнку.
Нягледзячы на аптымістычныя звесткі афіцыйнай статыстыкі пра рост беларускай эканомікі ў першым квартале на 5,2%, свежая інфармацыя робіць эфект халоднага душа.
Так, паводле звестак аўтарытэтнай арганізацыі, беларусам не варта разлічваць на эканамічны рост вышэйшы за 2,4% сёлета і 2,5% налета. І гэта пры тым, што сярэднесусветны УБП у гэты перыяд будзе расці значна хутчэй - на 3,9% штогод.
- МВФ з асцярожнасцю ацэньвае перспектывы беларускай эканомікі, - у экспрэс-каментары «Салідарнасці» тлумачыць эканаміст Барыс Жаліба. - Там разумеюць, што яе развіццё шмат у чым залежыць ад вонкавых чыннікаў. Гэта, перш за ўсё, кошт нафты і нафтапрадуктаў, калійных угнаенняў ды іншых тавараў, якія ідуць на экспарт.
Высокія тэмпы эканамічнага росту ў першым квартале былі звязаны з тым, што была нізкая база ў мінулым годзе. Думаю, што на працягу года мы ўбачым павольнае замаруджванне афіцыйных тэмпаў росту.
Суразмоўца упэўнены, што Беларусь яшчэ не выбралася з эканамічнай ямы. І міжнародныя крэдыторы гэта выдатна бачаць:
- Наша эканоміка спусцілася, асабліва ў 2015-2016 гадах, калі была магутная адмоўная дынаміка УБП. Найлепшы паказчык у нас быў ў 2014 годзе, калі ўнутраны брута-прадукт складаў 76 мільярдаў даляраў паводле курсу. А цяпер мы выйшлі толькі дзесьці на 55 мільярдаў.
Гэта значыць, мы дагэтуль б'емся за тое, каб проста аднавіць страчаныя пазіцыі. За гэты час нашы суседзі пайшлі далёка наперад - Польшча і краіны Балтыі ўжо ў разы абганяюць Беларусь паводле ўзроўню УБП на душу насельніцтва.
Эканаміст мяркуе: каб пачаць іх здаганяць, патрэбны эканамічны рост блізу 6-7% за год. А для гэтага трэба праводзіць рэформы, якія Беларусі прапануе той жа МВФ.
- Гэта, перш за ўсё, структурныя рэформы ў галіне дзяржаўнага сэктару. Трэба змяншаць прысутнасць дзяржавы ў эканоміцы, падтрымліваць развіццё прыватнай ініцыятывы, развязаць праблему з вялікімі пазыкамі дзяржаўных прадпрыемстваў.
У нас захоўваецца інэрцыя і цэнтралізаванасць эканомікі. Як улады звыклі працаваць, як заўжды, так яны і працягваюць. Ёсць боязь страціць ніткі кіравання краінай.
На жаль, без рэформаў эканоміка Беларусі будзе вымушаная расці не больш за 3% на год. Гэта азначае, што адставанне ад іншых краін будзе павялічвацца, - падкрэслівае Барыс Жаліба.