Не стала кіраўніка хору «Унія» Кірыла Насаева
4- 17.07.2018, 12:40
- 11,202
Хормайстру і музыказнаўцу было 57 гадоў.
Апошнія гады Кірыла Насаеў цяжка хварэў, паведамляе «Радыё Свабода». Ён быў выдатным хормайстрам, а зарабляў на жыццё як будаўнік. Такая эпоха.
Беларускі хормайстар, музыколаг і педагог Кірыла Насаеў - стваральнік знакавых праектаў «Музыка Літвы і Кароны», «Музыка беларускіх храмаў», «Беларускія маршы і песні. Лірыка змагання».
Мужчынскі хор «Унія» ўзнік у пачатку 1990-х. Праваслаўныя, каталікі, уніяты, пратэстанты сабраліся з адной мэтай - каб спяваць беларускія храмавыя песні.
Кірыла нарадзіўся ў сям'і вайсковага інжынера, але з дзяцінства захапляўся музыкай - маці была настаўніцай музыкі. Спяваў у хоры хлопчыкаў пры кансерваторыі, а потым паступіў і ў кансерваторыю. Вайсковую службу Насаеў праходзіў у ансамблі песні і танца Чырванасцяжнай Беларускай вайсковай акругі, збіраў беларускія песні на патрыятычную тэматыку.
У 1993 годзе падрыхтаваў на просьбу кіраўніка ансамбля песні і танца «Пагоню» і «Мы выйдзем шчыльнымі радамі». Праз некалькі гадоў запісаў альбом «Беларускія маршы і песні. Лірыка змагання». У альбоме сабраныя гістарычныя песні і аўтарскія творы XX стагоддзя - «Не пагаснуць зоркі ў небе», «Пагоня», «Мы выйдзем шчыльнымі радамі» і іншыя.
Хор «Унія» стаў пераможцам на першым фэсце духоўнай музыкі «Магутны Божа» ў 1993 годзе.
З дзіцячым хорам стварыў праект «Простыя словы» на вершы Міхала Анемпадыстава.
А гэта рэквіем «Спіце ўсе тыя, што праўды на свеце шукалі» на вершы Янкі Купалы: