Расейцы вінныя банкам кожны чацвёрты зароблены рубель

Насельніцтва Расеі прадаўжае нарошчваць пазыку, ствараючы для сябе ілюзію «стабільнага ўзроўню жыцця».

За студзень-травень запазычанасць фізічных асоб перад банкамі павялічылася на 883 млрд расейскіх рублёў - беспрэцэдэнтную суму, якая ў намінальным вылічэнні вышэйшая за паказчыкі крэдытнага буму «спакойных» 2012-13 гг. Як піша сайт finanz.ru, пра гэта паведамляе ў ліпеньскім «Маніторынгу» РАНГіДС.

Агульная сума завінавачанасці ўстанавіла чарговы гістарычны максімум на 13,5 трыльёна расейскіх рублёў. Гэта практычна кожны чацвёрты рубель гадавых грашовых даходаў насельніцтва (23,9%).

Вышэйшай пазыковая нагрузка была толькі перад крызісам ў 2014 годзе (25%), аднак гэты рэкорд будзе пабіты найбліжэйшыя месяцы, калі ўлічыць, што людзі набіраюць крэдыты амаль удвая хутчэй, чым растуць іх заробкі (7,1% супраць 4% на студзень-травень), кажа старшы навуковы супрацоўнік РАНГіДС Міхаіл Хромаў.

Тое, што адбываецца - натуральная рэакцыя: насельніцтва спрабуе падтрымаць пэўны ўзровень жыцця ва ўмовах стагнацыі даходаў, дадае ён.

З дапамогай банкаўскіх крэдытаў расейцы фінансуюць кожны 20-ы рубель сваіх выдаткаў на канчатковае спажыванне і адначасова пачынаюць праядаць ашчадак, вынікае са звестак РАНГіДС.

Па выніках першага квартала дзель даходаў, накіраваных на ашчадак (6%), была мінімальнай за 18 гадоў, а аб'ём выдадзеных крэдытаў упершыню з 2013 года перавысіў прыток дэпазітаў у банкі. За 5 месяцаў гэтая розніца склала 553 млрд расейскіх рублёў.

Пераважнай большасці толькі крэдыты дазваляюць выйсці за межы базавых патрэб, паказвае Хромаў: падчас апытання ў пачатку года 70% расейцаў заявілі, што заробленых грошай ім стае толькі на тавары першай неабходнасці - прадукты харчавання і адзенне, а на бытавую тэхніку, напрыклад, сродкаў ужо няма.

Сітуацыя, калі рост пазыкі ў разы апярэджвае рост даходаў з'яўляецца «нездаровай і вядзе да крызісу», кажа дырэктар аналітычнага дэпартамента «Локо-Інвест» Кірыл Трэмасаў: «Гэта тычыцца не толькі спажывецкага крэдытавання, але і іпатэкі. Насельніцтва за апошнія гады нагрузілі велізарнай сумай завінавачанасці , але без росту даходаў абслугоўваць гэтыя пазыкі будзе ўсё больш складана».

Са звестак Расстату, на травень рэальныя гатовыя даходы ў РФ павялічыліся ўсяго на 0,3% (пасля падзення на 11% за папярэднія 4 гады). На 2019-ы год Мінэканомікі прагназуе толькі 0,9% іх росту.