Стала вядомае імя затрыманага за хабар гендырэктара дзяржхолдынга
15- 13.07.2018, 16:14
- 25,969
Кіраўнік «Мінаблмясамалпрама» атрымаў хабар 85 тысячаў еўраў.
Тры не звязаныя адна з адной крыніцы апавялі tut.by, што гэта кіраўнік камунальнага ўнітарнага прадпрыемства «Мінаблмясамалпрам» – кіраўнічая кампанія холдынгу «Мясамалпрам» Уладзімір Лапіцкі.
У Следчым камітэце адмовіліся пацвердзіць затрыманне Лапіцкага і каментаваць інфармацыю пра затрыманне гендырэктара буйнога дзяржаўнага холдынгу.
– Мы не будзем называць галіну і ўстановачныя звесткі фігурантаў у гэтай справе, – сказала парталу афіцыйная прадстаўніца СК Юлія Ганчарова.
У «Мінаблмясамалпраме» таксама адмовіліся ад каментароў.
Знаёмы Лапіцкага пацвердзіў затрыманне, але, каментуючы тое, у чым топ-мэнэджара падазраюць, адзначыў, што «гэта гісторыя не пра яго».
– Ён стаў пешкай у іншай гульні. З'ездзіце ў Барысаў і хай вам людзі пра яго апавядуць. Гэта будзе аб'ектыўна, – дадаў ён.
Уладзімір Лапіцкі стаў гендырэктарам «Мінаблмясамалпрама» ў сакавіку 2017 года. А да гэтага больш за 20 гадоў адпрацаваў на барысаўскім малочным заводзе.