Птушаняты з гнязда Шайгу. У міністэрстве абароны РФ прызналі шматмільярднае раскраданне

У карупцыйны скандал трапілі экс-чыноўнікі МНС Расеі, якія перайшлі ў Мінабароны разам з Шайгу.

Былыя чыноўнікі Мінабароны, якія прыйшлі ў ведамства з МНС след за Сяргеем Шайгу, навыперадкі "здаюць" адзін аднаго следству паводле справы Спецбуду, дзе былі выяўлены крадзяжы на суму больш за 5 мільярдаў рублёў.

Як паведамляе "Коммерсант", даць прызнальныя сведчанні і пайсці на дасудовую ўгоду наважыўся ўжо пяты фігурант расследавання - намеснік кіраўніка Спецбуду 51-гадовы Аляксандр Загарулька.

Ён цалкам прызнаў сваю віну ў тым, што атрымліваў хабары за ўкладанне буйных кантрактаў з выканаўцамі, а акрамя таго, ён даў сведчанні на свайго непасрэднага кіраўніка - кіраўніка "Спецбуду" Аляксандра Воласава.

Апошні, як паведаміў Загарулька, таксама атрымліваў хаюары ў рамках розных схем. Абодва - і Воласаў, і Загарулько - да прыходу ў Мінабароны з 1995 года працавалі ў сістэме МНС.

Расследаванне крымінальнай справы аб маштабных крадзяжах (ч. 4 арт. 159 КК РФ) пры будаўніцтве і рэканструкцыі аб'ектаў Мінабароны было распачатае летам мінулага года. Яго першымі фігурантамі сталі прадпрымальнікі Ваха Арцыгаў, Кадыр Караханаў і Арсен Ашакбаеў, якія скралі, паводле версіі следства, блізу 450 млн руб.

Першым на супрацоўніцтва са следствам пайшоў Ашакбаеў, які распавёў, што за атрыманне падрадаў яму даводзілася плаціць высокапастаўленым супрацоўнікам Спецбуда. На допыце бізнэсовец назваў прозвішча намесніка кіраўніка Спецбуду Аляксандра Буракова.

Пасля праверкі гэтай інфармацыі летам 2016 года следчым дэпартаментам МУС Бурак быў затрыманы. Яму выставілі абвінавачанне ў асабліва вялікім махлярстве. Адседзеўшы некалькі месяцаў у следчым ізалятары, ён пайшоў на угоду, даўшы сведчанні ўжо на Загарульку.

Буракова пры гэтым перавялі пад хатні арышт і ўзялі пад дзяржабарону, а Загарулька быў затрыманы.

Цяпер жа і ён уклаў угоду, а следства мае намер прасіць суд аб змяненні яму меры стрымання з рэальнага арышту на хатні.

Нагадаем, агулам на абарону і нацыянальную бяспеку ўрад выдае 3,15 трлн рублёў, або кожны чацвёрты рубель выдаткаў.

З іх блізу 2 трлн - гэта выдаткі на закупку новых узбраенняў, мадэрнізацыю наяўнай зброі, а таксама будаўніцтва і набыццё тэхнікі і тавараў для патрэб Мінабароны.

Як высветліў у траўні ЦБ, банкі, якія абслугоўваюць гэтыя грошы, уцягнутыя ў маштабныя схемы для атрымання гатоўкі.

Крыніца, блізкая да Цэнтрабанка і Расфінманіторынгу, паведаміла "Ведомостям", што, са звестак праверкі, ад 50% да 70% сум сыходзяць на перавядзенне ў гатоўку.