Выратаваныя тайскія дзеці: першыя фатаграфіі з лякарні

Апублікаваныя першыя фатаграфіі тайскіх хлопчыкаў пасля таго, як іх выратавалі з затопленай пячоры.

На невыразных здымках відаць, што дзеці ляжаць на бальнічных ложках з ахоўнымі маскамі на твары і ў бальнічных кашулях. Адзін з іх паказвае пальцамі знак V - знак перамогі, піша ВВС.

Група падлеткаў 11-16 гадоў і іх 25-гадовы трэнер у футболе зніклі 23 чэрвеня ў пячорным комплексе Тхам Луанг, куды яны адправіліся на экскурсію. Праз праліўныя дажджы ў пячоры стала рэзка прыбываць вада, і яны былі вымушаныя сысці ўглыб на чатыры кіламетры, апынуўшыся такім чынам адрэзанымі ад уваходу.

Пошукі зніклай футбольнай каманды працягваліся дзевяць дзён. 2 ліпеня падлеткаў выявілі брытанскія дайверы Джон Валантэн і Рык Стэнтан.

На ўсім працягу шляху кожнага падлетка суправаджалі па два выратавальнікі: у затопленых участках пячорнай сістэмы іх прывязвалі да аднаго з дайвераў, а па сухім участках перапраўлялі ў насілках.

Пасля завяршэння аперацыі паступалі супярэчлівыя звесткі пра тое, якія медыцынскія прэпараты прынялі падлеткі перад пачаткам аперацыі. Тайскі прэм'ер-міністр напярэдадні заявіў, што хлопчыкам давалі не заспакойлівыя сродкі, а толькі лёгкія транквілізатары, якія ёсць у распараджэнні вайскоўцаў.

Але ўжо некалькі крыніц зняпраўдзілі гэтую інфармацыю, паведаміўшы, што падлеткі былі ў паўсвядомым стане, калі іх выводзілі з пячоры.

Камандзір спецназам ВМФ Тайланда сказаў у інтэрв'ю Бі-бі-сі, што надзея ператварылася ў рэальнасць пасля таго, як усе 12 хлопчыкаў і іх трэнер былі выратаваны з пячоры.

«У нас была невялікая надзея, што яны ўсё яшчэ жывыя, але мы былі абавязаны гэта рабіць [працягваць пошукі], мы павінны былі прасоўвацца наперад. Надзея была нікчэмнай, але нам трэба было працягваць працаваць», - сказаў контр-адмірал Арпакорн Юкангкаў.

На старонцы спецназа тайскага ВМФ з'явілася фатаграфія чатырох «марскіх коцікаў», якія ўвесь час заставаліся з хлопчыкамі ў пячоры і падтрымлівалі іх.

Таксама на старонцы спецназа ў «Фэйсбуку» з’явіліся фатаграфіі і відэа выратавальнай аперацыі.

Усе падлеткі страцілі ў вазе і прабудуць у шпіталі яшчэ тыдзень, пасля чаго яшчэ тыдзень будуць аднаўляцца дома. Прадстаўнікі міністэрства аховы здароўя паведамілі, што дзеці, выратаваныя першымі, ужо перайшлі на звычайную ежу, усе астатнія будуць пераведзеныя на звыклае харчаванне ў найбліжэйшыя дні.

Група падлеткаў, якіх выратавалі апошнімі, цяпер праходзіць медыцынскае абследаванне, але, паводле папярэдніх звестак, адчуваюць яны сябе нармальна. Інфекцый ні ў каго з іх не знайшлі.

«Мы не ведаем, ці можна гэта растлумачыць цудам, навукай ці чымсьці яшчэ. Усе 13 «дзікоў» [назва футбольнага клуба] выйшлі з пячоры», - гаворыцца ў паведамленні тайскага спецназа.

Дзясяткі дайвераў і сотні іншых удзельнікаў выратавальнай аперацыі пакідалі пячору Тхам Луанг з радаснымі крыкамі. У суседнім горадзе Чыанграй кіроўцы сігналілі ў сваіх аўтамабілях, а людзі, якія сабраліся ля бальніцы, гучна пляскалі ў далоні.

Тайцы з цяплом адклікаліся пра ратавальнікаў у сацсетках, выкарыстоўваючы хэштэгі #Heroes (героі) і #Thankyou (дзякуй). Міжнародныя футбольныя клубы, сярод якіх «Манчэстар Юнайтэд» і «Бенфіка», запрасілі каманду і іх трэнера прыехаць на матчы.