У Шчучыне для турыстаў адкрылі некалі засакрэчаны падземны бункер

Яго выкупіла турыстычная фірма.

Крыху больш за два гады таму вы маглі чытаць вялікі рэпартаж пра тое, у што ператварыўся былы сакрэтны аэрадром і бункер камандавання авіяцыяй у Шчучыне. У той час аб'ект быў зачынены для старонніх і патрапіць туды было не так проста. Аднак цяпер стала вядома, што тэрыторыя была адкрытая для турыстаў, а ў будучыні тут плануюць максімальна ўзнавіць дзейнасць вайсковага аб'екта, паведамляе grodnoplustv.by.

Яшчэ 30 гадоў таму Шчучын лічыўся адным з буйных цэнтраў савецкай вайсковай авіяцыі. Як мы распавядалі раней, тут базаваліся і рэактыўныя бамбавікі, здольныя несці ядзерны зарад, і звышгукавыя знішчальнікі. У адрозненне ад мноства разрабаваных і знішчаных вандаламі аб'ектаў, шчучынскі бункер нядрэнна захаваўся. Гэта схаваны земляным узгоркам двухпавярховы будынак арачнага тыпу, адкуль кантралявалася аператыўная паветраная абстаноўка. Бункер быў добра замаскіраваны і замацаваны на выпадак вайны.

Пасля расфармавання дывізіі вайскоўцы выкарыстоўвалі аб'ект гадоў дзесяць, а ў пачатку 2000-х канчаткова сышлі, перадаўшы бункер Шчучынскаму райвыканкаму. Абмяркоўвалася магчымасць арганізаваць там штаб грамадзянскай абароны. Былі і іншыя ідэі, але карыснага прымянення аб'екту так і не знайшлі. Камандны пункт закансервавалі і выставілі ахову.

Аднак блізу года таму комплекс узяла ў арэнду мясцовая турыстычная кампанія. Цяпер прадстаўнікі кампаніі спрабуюць узнавіць антураж вайсковага мінулага.

- Нам дапамагалі людзі. Мы знаходзілі людзей, якія нейкае дачыненне мелі да гэтага бункеру. Яны нам распавядалі, давалі інфармацыю, якую мы вывучылі. Разбіраліся з кожным памяшканнем. Што, для чаго. А потым паціху пачалі завозіць нейкую маёмасць, - распавяла экскурсавод-аніматар Анастасія Маркоўская.

Увесь антураж для памяшканняў збіраецца па крупінках праз знаёмых. Рыхтуюцца сцэнарыі для турыстаў. Тут плануюць максімальна ўзнавіць дзейнасць вайсковага аб'екта. Усіх планаў не раскрываюць. Што і як будзе - пакуль таямніца. Але першыя турысты ўжо ў захапленні ад самога аб'екта.

- Плануем максімальна стварыць умовы, каб людзі сюды прыязджалі, маглі акунуцца ў вайсковы час. На сабе адчуць армейскі побыт. Мы хочам, каб яны траплялі ў савецкае войска, - патлумачыла экскурсавод-аніматар Валерыя Волчак.

Як распавялі Onliner.by ў кампаніі «Ларыстур», якая ўзяла на сябе шэфства над аб'ектам, пакуль ён працуе ў тэставым рэжыме. Тут праводзяцца экскурсіі, на якія можна запісацца праз тэлефон. Паўтарагадзінная прагулка з экскурсаводам па тэрыторыі помніка халоднай вайны каштуе 5 рублёў, 2/3 гэтага часу турысты праводзяць пад зямлёй.

У будучыні тут будзе арганізаваны квэст, удзельнікам якога прапануюць за пэўны час выбрацца з бункера. Таксама тут павінен з'явіцца пастаянны экскурсавод.