Дырэктара калоніі ў Івацэвічах будуць судзіць за хабар сумай €207 тысяч

Хабар прызначаўся для развязання пытання аб пастаўках беларускай прадукцыі за мяжу.

Пракуратура накіравала ў суд крымінальную справу паводле абвінавачвання былога дырэктара «папраўчай установы №5». Яго абвінавачваюць у злачынстве супраць інтарэсаў службы. Пра гэта паведамляе прэс-служба Генпракуратуры.

Былога дырэктара рэспубліканскага ўнітарнага вытворчага прадпрыемства «Папраўчая ўстанова №5» у Івацэвічах абвінавачваюць у атрыманні хабару ў асабліва значнай суме.

«Абвінавачванаму інкрымінаванае тое, што ён, будучы службовай асобай, дзейнічаючы з карыслівых меркаванняў, у перыяд з 17 сакавіка 2009 года да 4 сакавіка 2013 года атрымаў ад прадстаўніка французскай кампаніі ў якасці хабару 207 365 еўраў. Прадметам такой дамоўленасці стала развязанне пытанняў, звязаных з укладаннем і выкананнем дамоваў аб пастаўках за межы краіны мэблі, вырабленай на беларускім прадпрыемстве», - распавялі ва ўстанове.

Абвінавачаны знаходзіцца пад вартай. Яму пагражае да 15 гадоў пазбаўлення волі з канфіскацыяй маёмасці.

Рэспубліканскае ўнітарнае вытворчае прадпрыемства «ПУ №5» ДВП МУС Беларусь (больш вядомая як папраўчая калонія №5 або як мужчынская калонія строгага рэжыму ў Івацэвічах) з'яўляецца прадпрыемствам крымінальна-выканаўчай сістэмы.

«Прадпрыемства створанае ў 1986 годзе з мэтай прыцягнення асуджаных да працы і вытворчасці прадукцыі, з'яўляецца вытворчай адзінкай ДВП МУС», - паведамляецца на сайце «ПУ №5».