«Ліст шчасця» за паркоўку: Як ДАІ вылічае парушальнікаў «новым метадам»

Парушэнні правілаў спынення і стаянкі транспартных сродкаў цяпер рэгіструюць у аўтаматычным рэжыме.

У гэтым ДАІ «дапамагае» мабільны апаратна-праграмны комплекс (АПК) «ПаркРайт». Як ён працуе, пазнаёміўся карэспандэнт агенцтва «Минск-Новости»:

«Гэтыя прыборы ў гарадской ДАІ сталі актыўна выкарыстоўваць у сакавіку гэтага года. З таго часу гараджанам адпраўленыя амаль 3 тысячы пастаноў аб накладанні адміністрацыйнага спагнання. Усяго за 5 месяцаў 2018 года супрацоўнікі ДАІ выявілі ў Менску 16 705 парушэнняў правілаў прыпынення і стаянкі транспартных сродкаў.

Са старшым інжынерам аддзялення сувязі ды інфармацыйнага забеспячэння ДАІ ГУУС Менгарвыканкама Андрэем Раманчуком збіраемся выехаць да чыгуначнага вакзала. Усталёўваем у салоне патрульнага аўтамабіля прыбор: ён прысоскамі мацуецца на лабавую шыбу. На ўсё пра ўсё сыходзіць менш за 5 хвілін.

- У распараджэнні сталічнай Дзяржаўтаінспекцыі 10 такіх прыбораў, - інфармуе супрацоўнік ДАІ. - Дзевяць - у раённых аддзелах ДАІ, яшчэ адзін калегі выкарыстоўваюць у Нацыянальным аэрапорце Менск.

Папярэдне АПК трэба «навучыць», гэта значыць унесці ў яго інфармацыю аб адцінках вуліцы, дзе забароненае спыненне і стаянка. Для гэтага запісваецца пачатак і канец зоны кантролю. У сталіцы блізу 35 зон, дзе вядзецца кантроль з дапамогай АПК. Гэта вуліца Уманская на адцінку ад праспекта Дзяржынскага да вуліцы Чыгуначнай, праезная частка вакол Камароўскага рынку, Партызанскі праспект каля станцыі метро «Магілёўская», вуліца Прытыцкага ў раёне Кунцаўшчыны і Каменнай Горкі. І спіс праблемных адцінкаў толькі пашыраецца.

Заязджаем на Прывакзальную плошчу. Пры набліжэнні патрульнага аўтамабіля да забароненага адцінку прыбор аўтаматычна ўключае запіс відэа з агляднай камеры. Пайшоў збор інфармацыі аб аўтамабілях. Пры гэтым ідэнтыфікуюцца ўсе рэгістрацыйныя знакі, якія трапілі ў зону назірання, якую распазнае камера. Месцазнаходжанне нашага аўто вызначаецца з дапамогай навігацыйнага прымача GPS.

Са слоў А. Раманчука, «ПаркРайт» вызначае парушальнікаў правілаў паркоўкі не толькі удзень, але і ўначы. Для гэтых мэтаў служыць ІЧ-пражэктар. Прыбор здольны праз базу звестак распазнаваць у плыні транспартныя сродкі, якія знаходзяцца ў вышуку, альбо якімі кіруюць кіроўцы, раней пазбаўленыя права кіравання.

Рухаемся вуліцай Бабруйскай. Побач з аўтавакзалам звяртаем увагу на знак, які забараняе прыпыненне і стаянку. Без якіх-небудзь каманд комплекс пачынае фіксаваць парушальнікаў ПДР.

- Аўтамабілі шчыльна стаяць у шэрагу, - звяртае ўвагу старшы інжынер. - Таму едзем павольна, з хуткасцю 15-20 км/г. Хоць АПК здольны фіксаваць парушэнні правілаў пры руху да 50 км\г.

Выязджаем з зоны забароны. У памяць занесена інфармацыя аб патэнцыйных парушальніках правілаў паркоўкі. Адпраўляемся на другое кола. Прыбору трэба пераканацца, што ўсе гэтыя транспартныя сродкі стаяць пад знакам не 5, а больш хвілін. Пры паўторным праездзе па гэтай жа зоне комплекс зноўку збірае інфармацыю. Калі выяўляе аўто з тымі ж дзяржаўнымі знакамі і па тых жа каардынатах, пазначае іх як парушальнікаў.

У выніку «лісты шчасця» атрымаюць 7 уладальнікаў легкавікоў. У пастанове аб накладанні адміністрацыйнага спагнання супрацоўнікі ДАІ пакажуць месца ўчынення правапарушэння, звесткі аб транспартным сродку і яго ўласніку, суму штрафу, тэрмін і спосабы яго выплаты, правілы абскарджання пастановы. Доказнай базай служаць 4 фатаграфіі з выявай аўтамабіля і рэгістрацыйнага знака.

- Многія кіроўцы маршрутак і звычайных таксі ведаюць пра існаванне АПК, - кажа спецыяліст. - Некаторыя замацоўваюць нумарныя знакі сцяжкамі, шрубамі або самарэзамі. Прычым укручваюць іх па-хітраму, каб, да прыкладу, з нуля атрымалася васьмёрка. А то і зусім падціраюць літары і лічбы. Але ўсе гэтыя хітрыкі марныя. Парушальнікаў мы выяўляем і прыцягваем да адміністрацыйнай адказнасці. Да таго ж «ПаркРайт» фіксуе не толькі беларускія, але і расейскія нумары, рэгістрацыйныя знакі іншых краін. Пастанова выносіцца ў дачыненні да ўсіх парушальнікаў ПДР. І калі госць парушыў правілы прыпынення і стаянкі ў Менску, то пры выездзе з краіны кіроўцу пра незаплачаны штраф абавязкова нагадаюць».