КДБ: Кошт лекаў і абсталявання праз карупцыю завышаўся у асобных выпадках на 100%

Старшыня КДБ пракаментаваў новыя масавыя затрыманні чыноўнікаў Міністэрства аховы здароўя.

Кошт лекаў і абсталявання праз карупцыю завышаўся на 10-60%, у асобных выпадках - на 100%, паведаміў сёння журналістам старшыня КДБ Валерый Вакульчык, паведамляе БелТА.

Валерый Вакульчык нагадаў, што дыктатар даў ураду даручэнне знізіць кошт лекаў. «Пры гэтым, што са зразумелых прычын засталося за кадрам, Камітэту дзяржаўнай бяспекі было даручана глыбока і ўсебакова разабрацца ў прычынах завышэння кошту лекаў і медыцынскага абсталявання. Гэтая праца камітэтам была праведзеная. У медыцынскай сферы выкрытыя сістэмныя карупцыйныя праявы. Устаноўлена, што кошт і лекаў, і абсталявання завышаўся на 10-60%, у асобных выпадках на 100%», - сказаў старшыня КДБ.

Злачынныя схемы, выкарыстаныя пастаўшчыкамі медыцынскага абсталявання і лекаў, у тым ліку па ўхіленню ад выплаты падаткаў, прадугледжвалі вывад звышпрыбыткаў у выглядзе незаконна атрыманых грашовых сродкаў на рахункі юрыдычных асоб у ПАР, Ганконгу (КНР), Літве, Латвіі, Расеі і іншых краінах.

«З іх на хабары без перабольшання сыходзілі мільёны даляраў ЗША. У выніку ператрусаў, добраахвотнай аплаты шкоды, вяртання незаконна атрыманых сродкаў у даход дзяржавы паступіла ўжо больш як $15 млн. Аператыўна-вышуковыя і следчыя дзеянні працягваюцца», - адзначыў Вакульчык.

«Фактычна механізм допуску лекаў і медабсталявання на рынак краіны быў настолькі забюракратызаваны, што хаджэнне па кабінетах медыцынскіх чыноўнікаў і валакіта займалі месяцы і нават больш. Як следства, медустановы не маглі своечасова атрымаць патрэбнае абсталяванне або запчасткі да яго. Такім чынам, устаноўлена, што фактычна існуючая сістэма закупак медыцынскага абсталявання і лекаў стварала ўмовы для карупцыйных праяў», - канстатаваў старшыня КДБ.

«Напрыклад, перагарэла лямпа ў аперацыйнай. Развязанне элементарнага пытання па замене доўжылася месяцамі, суправаджалася паседжаннямі камісій і фактычна стала нормай, калі дарагое, запатрабаванае абсталяванне прастойвала месяцамі і выключна з фармальных падстаў», - растлумачыў ён.

З іншага боку, добрасумленныя пастаўшчыкі не маглі разлічваць на станоўчы вынік. Закупкі ажыццяўляліся не ў вытворцаў, а ў шматлікіх пасярэднікаў, фінансавых кампаній, дадаў Валерый Вакульчык.

У КДБ падкрэсліваюць, што выкрытыя факты супрацьпраўнай дзейнасці ў сістэме аховы здароўя дазволяць ацаніць рэальны стан спраў у закупках лекаў і медыцынскага абсталявання, будуць спрыяць зніжэнню іх кошту і эфектыўнага выкарыстання бюджэтных сродкаў, якія выдзяляе дзяржава на гэтыя патрэбы. Гэта таксама дапаможа выключыць прычыны і ўмовы для карупцыйных праяў, паспрыяе стварэнню празрыстага і роўнага механізму набыцця лекаў і медыцынскага абсталявання. З пункту гледжання вядзення бізнэсу гэта будзе выгадна як добрасумленным пастаўшчыкам, так і дзяржаве, а таксама канчатковаму спажыўцу - насельніцтву Беларусі. «Для любога прафесіянала і нават непрафесіянала відавочна, што гаворка ідзе не пра разавыя мерапрыемствы, не пра біццё па хвастах, а аб сістэмнай глыбокай мэтанакіраванай працы ў спыненні карупцыі ў нашай краіне», - рэзюмаваў Валерый Вакульчык.