Дзясяткі тысяч чалавек узялі ўдзел у пратэстах ля будынка парламента Малдовы

Пратэстоўцы патрабуюць прызнаць вынікі выбараў мэра Кішынёва, у якіх атрымаў перамогу апазіцыйны кандыдат.

У Кішынёве тысячы пратэстоўцаў прыйшлі да будынка парламента з патрабаваннем прызнаць вынікі датэрміновых выбараў мэра малдаўскай сталіцы, у якіх атрымаў перамогу апазіцыйны кандыдат. Пра гэта паведамляюць Moldpres і Jurnal.md. Малдаўскае агенцтва навінаў Infotag паведамляе аб дзясятках тысячах пратэстоўцаў, піша РБК.

Як адзначае агенцтва, у другім туры выбараў кіраўніка горада Кішынёва, якія адбыліся 3 чэрвеня, перамог старшыня апазіцыйнай партыі «Платформа «ДА» Андрэй Нэстасе. Выступаючы на мітынгу перад прысутнымі, ён сказаў, што сёння яны бароняць не мэрскі мандат, «а сваю будучыню і будучыню сваіх дзяцей у гэтай краіне». «Мы пазбавім сябе гэтай будучыні, калі мы сёння здадзімся», - сказаў Нэстасе.

На думку пратэстоўцаў, кіроўная Дэмакратычная партыя краіны і яе лідар Улад Плахатнюк не хочуць, каб кіраваў Кішынёвам Нэстасе, «які змагаецца з мафіяй». Намеснік старшыні партыі «Платформа «ДА» Аляксандр Слусар адзначыў, што кандыдат пасля выбараў стаў разбірацца з незаконным будаўніцтвам, якім, з ягоных словах, у Кішынёве займаецца арганізаваная злачыннасць.

Сам Нэстасе падаў пазоў у Вярхоўны суд, каб аспрэчыць пастанову аб скасаванні вынікаў выбараў. Свой вердыкт ён павінен вынесці 2 ліпеня. У тым выпадку, калі вынікі новых выбараў не будуць зацверджаныя, мэрыя і адміністрацыя горада працягнуць працу ў тым жа складзе да наступных выбараў, якія пройдуць у 2019 годзе. На сёння выконвае абавязкі мэра Кішынёва Руслан Кадрану ад Еўрапейскай народнай партыі Малдовы.