Заўтра ў Беларусі чакаецца да 22 градусаў цяпла
- 21.06.2018, 19:23
- 8,079
На большай частцы тэрыторыі краіны чакаюцца навальніцы.
У пятніцу, 22 чэрвеня, на большай частцы тэрыторыі Беларусі чакаюцца навальніцы і ўзмацненне ветру, папярэджвае Белгідрамет.
Кароткачасовыя навальнічныя дажджы пройдуць уначы і раніцай на большай частцы тэрыторыі, а ўдзень па ўсходзе краіны. У асобных раёнах чакаюцца моцныя ліўні. Удзень магчымы град.
Вецер паўднёвы з пераходам на заходні ўмераны, пры навальніцах месцамі моцны шквалісты.
Тэмпература паветра ў начныя і ранішнія гадзіны панізіцца да +10... 16°С, у другой палове дня павысіцца да +17... 22°С. Цяплей будзе на ўсходзе рэспублікі - уначы +17... 19°С, удзень +23... 28°С.
Ратавальнікі нагадваюць, што самая вялікая небяспека пры навальніцы - паражэнне маланкай.
Падчас навальніцы лепш не знаходзіцца побач з жалезабетонным палатном, каля вадаёма, ля вышыннага аб'екта без маланкаадвода. Не варта дакранацца паверхні ствалоў дрэў, металічных канструкцый. Лепш размясціцца на адлегласці 1,5-2 метра ад высокіх дрэў, апор ЛЭП.
У населеных пунктах падчас навальніцы варта пакінуць адкрытую прастору і схавацца ў памяшканні або ў пад'ездзе любога дома.
Калі наважылі схавацца пад брылём будынка, не дакранайцеся да сцяны. Не карыстайцеся мабільным тэлефонам. Не стойце паблізу высокіх слупоў, рэкламных шчытоў і г.д.